Իմ ընկերներին ոչ մի տեղ չեմ նշանակում միայն այն բանի համար, որ նրանք իր ընկերներն են. Արսեն Թորոսյան

ՀՀ առողջապահության նախարար Արսեն Թորոսյանը պաշտոնապես հայտարարում է, որ ինքը՝ որպես առողջապահության նախարար, չունի որևէ ընկեր: Լրագրողների հետ զրույցում անդրադառնալով լուրերին, որ իր ընկերներին է աշխատանքի ընդունում, նա ասաց, որ եթե որևէ մեկը կասի, որ առողջապահության նախարարի ընկերն է ու ունի առավելություն որևէ հարցում, ուրեմն նա ստում է:

«Իմ բոլոր գործողությունները բխում են միայն մեր գործի շահերից: Ինչ վերաբերում է հարցին, թե ինչպես եմ աշխատակիցներ ընտրում ու նշանակում, ապա նույն Նուբարաշենի հոգեբուժարանի՝ արդեն իսկ նախկին տնօրեն Նարեկ Վանեսյանի հետ ծանոթացել եմ 2 տարի առաջ, երբ նա առողջապահության նախարարության հասարակական խորհրդի անդամ էր, ու մի առիթով շփվել ենք: Հետո տեսել եմ, որ փորձ ունի, ու նա միանգամից չի նշանակվել տնօրեն. մեկ ուրիշը պարզապես չի դիմացել տեղում առկա իրավիճակին, հրաժարական է տվել, մրցույթ է հայտարարվել, ու նոր միայն Վանեսյանն է նշանակվել»,- ասաց Թորոսյանը:

Նրա խոսքով՝ նույնը վերաբերում է նաև Մասիվի ԲԿ-ի տնօրենի ժամանակավոր պաշտոնակատար Արման Հովակիմյանին, որին ուղղակի օգնել է տնօրենի նշանակման հարցում,  և որի հետ ինքը ծանոթացել է 4-5 ամիս առաջ:

Թորոսյանը նշեց նաև, որ ինքն իր ընկերներին ոչ մի տեղ չի նշանակում միայն այն բանի համար, որ նրանք իր ընկերներն են: «Այո, ես վստահելի մարդկանց եմ նշանակում, քանի որ հակառակն ուղղակի անհեթեթություն կլիներ»,- հավելեց նա: