Ֆուտբոլի Հայաստանի պատանիների հավաքականը կմասնակցի պատանեկան օլիմպիական խաղերի ընտրական մրցաշարին

2014 թ. օգոստոսի 16-28-ը Չինաստանի Նանկին քաղաքում տեղի կունենան պատանեկան ամառային օլիմպիական խաղերը. հայտնում է ՀՖՖ պաշտոնական կայքը:

Հայաստանի` 1999 թ. ծնված պատանիների հավաքականը կմասնակցի օլիմպիական մրցաշարի եվրոպական գոտու ընտրական փուլին: Հայաստանի հավաքականի մրցակիցները կլինեն Ֆինլանդիայի, Իսլանդիայի և Մոլդովայի հավաքականները:

Մրցաշարը տեղի կունենա Շվեյցարիայում, հանդիպումները կկայանան Նիոնի «Կոլովրե» մարզադաշտում: Հոկտեմբերի 19-ին տեղի կունենան կիսաեզրափակիչ հանդիպումները, իսկ հոկտեմբերի 21-ին՝ երրորդ տեղի համար և եզրափակիչ հանդիպումները: Պատանեկան օլիմպիական խաղերի ուղեգիր կնվաճի միայն հաղթող թիմը: