Ըմբշամարտ. աշխարհի չեմպիոն Դավիթ Սաֆարյանը կմասնակցի Իտալիայում կայանալիք մրցաշարին

Ազատ ոճի ըմբշամարտի Հայաստանի հավաքականի թեկնածուներն այս ամիս մասնակցելու են միջազգային երկու խոշոր մրցաշարի:

Նախ` 15 ըմբիշ մայիսի 23-25-ը ելույթ է ունենալու Մախաչկալայում կայանալիք Ալի Ալիևի անվան միջազգային մրցաշարում, ապա ամսվա վերջին՝ մայիսի 30-31-ը, վեց ըմբիշ՝ Իտալիայի Սասարի քաղաքում տեղի ունենալիք ներկայացուցչական ստուգատեսում:

Ազատ ոճի ըմբշամարտի Հայաստանի ազգային հավաքականի գլխավոր մարզիչ Արայիկ Բաղդադյանը ըմբշամարտի Հայաստանի ֆեդերացիայի պաշտոնական կայքի հետ զրույցում հայտնել է, որ Մախաչկալայում կմասնակցեն ընտրանու 2-րդ և 3-րդ համարները, որոնք ելույթ կունենան ազգային հավաքականի 2-րդ մարզիչ Հովսեփ Հովսեփյանի ղեկավարությամբ, իսկ ինքը կգլխավորի Իտալիա մեկնողներին:

Ըմբիշները ներկայումս հիմնականում մարզվում են իրենց անձնական մարզիչների հետ: Շաբաթը երեք օր էլ նրանք մարզումներ են անցկացնում հավաքականի հետ: Մարզչական շտաբի որոշմամբ` Իտալիայում հանդես են գալու ընտրանու առաջին համարները:

Վնասվածքից ապաքինված աշխարհի չեմպիոն, 65 կգ քաշային Դավիթ Սաֆարյանը վերսկսել է մարզումներն ու նույնպես կմասնակցի իտալական մրցաշարին: Աշխարհի չեմպիոնից բացի, իտալական մրցագորգ կելնեն նաև Գարիկ Բարսեղյանը (55 կգ), Վոլոդյա Ֆրանգուլյանը (60 կգ), Գրիգոր Գրիգորյանը (70 կգ), Մուսա Մուրթազալիևն (86 կգ) ու Էդգար Ենոքյանը (97 կգ):