Այս տարի բերքը շատ-շատ է. Սերգո Կարապետյան

Արդեն 20 օր է` ծիրանի բերքահավաքը սկսվել է, եւ բոլորս ականատես ենք, որ բարձր բերք է ապահովվում. այսօր կառավարությունում հայտարարեց գյուղատնտեսության նախարար Սերգո Կարապետյանը:

«Ամբողջ շուկաներում ու փողոցների վրա ծիրանը թափված է, եւ մարդիկ նույնիսկ 50 դրամով չեն կարողանում վաճառել, որովհետեւ բերքը շատ-շատ է»,- նշեց գյուղնախարարը:

Նրա հավաստմամբ` վերամշակող 16 գործարաններ մթերման գործը կազմակերպել են, եւ այսօրվա վիճակով արդեն մթերվել է 4539 տոննա ծիրան` անցյալ տարվա 2260 տոննայի փոխարեն: Արտահանվել է 12 հազար 240 տոննա ծիրան, անցյալ` ամբողջ տարվա 12 հազար 200 տոննայի փոխարեն:

«Այսինքն` այսուհետեւ սպասվում է լրացուցիչ 5-6 հազար տոննա ծիրանի արտահանման գործընթաց: Պտղի` ոչ միայն ծրանի, այլեւ դեղձի ու մնացած պտղատեսակների շատ բարձր բերք է սպասվում»,- հավաստիացրեց Սերգո Կարապետյանը: