Երեկ եղել եմ Տավուշի մարզում... Սերգո Կարապետյան

Այսօր կառավարության նիստում, երբ գյուղատնտեսության նախարարը զեկուցում էր հերթական որոշման նախագծի մասին, վարչապետ Հովիկ Աբրահամյանը խնդրեց նախարարին զեկուցել նաև խաղողի մթերման աշխատանքների ընթացքի մասին: 

Գյուղնախարարն ասաց, որ աշխատանքները ընթացքի մեջ են, այսօր կան 49 մթերող կազմակերպություններ, որոնցից 32-ն արդեն սկսել են մթերման աշխատանքները: Սերգո Կարապետյանը հավելեց, որ մթերման աշխատանքները չեն սկսվել Վայոց ձորի մարզում, այստեղ դրանք կիրակացվեն հոկտեմբերի 1-ից հետո:

«Երեկ եղել եմ Տավուշի մարզում, այնտեղ էլ աշխատանքներն ընթացքի մեջ են: Կան որոշակի դժվարություններ` հասկանալի պատճառներով, քանի որ գինեգործական ընկերությունները չեն կարողացել ապահովել ֆինանսական հոսքերը` արտահանման ծավալների կրճատման հետ կապված: Բայց բոլորի մոտ կա այն գիտակցումը, որ դաշտում չմթերված խաղող չի մնալու, եղած դժվարություններով հանդերձ` մթերումն իրականացնելու ենք»,- ասաց գյուղատնտեսության նախարարը՝ հավելելով, որ այս տարի խաղողի արտադրության ծավալները 30 տոկոսով ավելի են եղել:

Հովիկ Աբրահամյանը հանձնարարեց իրականացնել ամենօրյա հետևողական աշխատանք, և եթե խնդիրներ լինեն, կառավարությունը պատրաստ է աջակցել:

Հիշեցնենք, որ երեկ նախարարը եղել է սահմանամերձ Բերդավանում, և երբ սկսել են հնչել կրակոցներ, նա շատ արագ կողմնորոշվել է եւ հեռացել գյուղից: