Նախարարը հաստատեց, որ բանակցում են ''Գազպրոմ''-ի հետ

ԱԺ-ում լրագրողների հետ զրույցում էներգետիկայի եւ բնական պաշարների նախարար Արմեն Մովսիսյանը հավաստիացրեց, որ դեռեւս որեւէ գործարք չի կատարվել ռուսական «Գազպրոմ» ընկերության հետ` դրա մասնաբաժինը «ՀայՌուսգազարդում» 80%-ից 100% հասցնելու համար։

Նախարարը հայտարարեց, որ այս պահին բանակցություններ են ընթանում 20 տոկոս բաժնետոմսերը տալ-չտալու հարցի վերաբերյալ: Պարզվում է` բանակցությունների սեղանին դրված են այլ հարցեր եւս: Ըստ նախարարի` մինչեւ ամսվա վերջը բանակցությունները կավարտվեն:

Հարցին, թե ի՞նչ իմաստ ունի 20 տոկոսը հանձնել «Գազպրոմին». հետո այլեւս ոչինչ չենք ունենալու, եւ ռուսական կողմը այդ դեպքում կարող է ցանկացած գին թելադրել, Արմեն Մովսիսյանը պատասխանեց. «Խնդիրն այդպես չի դրված` որ ինչ ուզենան, անեն: Բանակցությունները հենց դրա համար են գնում, որ ինչ ուզեն, այն չանեն, այլ որպեսզի երկարատեւ ժամանակաշրջանի համար ավելի ապահովված գազամատակարարում ունենանք»: