Ինչ կա էս երկրում` շարժվող եւ անշարժ, ՀՀ-ինն ա. Մանվել Գրիգորյան

Արդեն տեղեկացրել ենք, որ ԱԺ արտահերթ նիստում ներկայացվել է ԵԿՄ վարչության նախագահ, գեներալ Մանվել Գրիգորյանի հեղինակած` «Երկրապահ կամավորականների կարգավիճակի մասին» օրենքի նախագիծը: Ելույթով հանդես եկավ գեներալ-պատգամավորը, ինչը մեծ ոգեւորություն առաջացրեց ԱԺ-ում:

Մանվել Գրիգորյանը հայտարարեց, որ շատ տղաներ կան, նաեւ ՀՅԴ-ից, որ իր հետ կռվել են, բայց չեն գրանցվել, կարգավիճակ չունեն, զենքերը ժամանակին ստացել, հետո հետ են հանձնել: «Խոսքը չի գնում երկրապահի անձնակազմի մասին, գնում ա երկրապահ կամավորականների մասին, կամավորականության մասին»,- հայտարարեց նա եւ տեղեկացրեց, որ, օրինակ, իրեն շատ վատ է զգում, երբ «Մազի պես տղեն» (Արմեն Մազմանյան) գալիս եւ իրենից լիազորագիր է ուզում:

Գրիգորյանը հայտարարեց, որ ինչ էլ անեն ազատամարտիկների համար, մեկ է` քիչ է: «Ախր, երկրապան Մանվելի սեփականությունը չի, սաղ Հայաստանի Հանրապետությանն ա: Երկրի պաշտպանությունը ոչ մեկի սեփականությունը չի, դա ՀՀ-ինն ա: Նույն այդ կամավորականը Լեւոն Տեր-Պետրոսյանն ա, Ռոբերտ Քոչարյանը, Սերժ Սարգսյանը, Աբրահամյան Հովիկն ա, վարչապետը, ովքեր էս երկրի բոլոր կառուցվածքներում են, միայն զինվորը չի, որ, եթե կրակել ա, կամավորական ա: Ստեղ մի պարզ խնդիր կա, սիրելինե'րս, սաղ, ինչ կա էս երկրում` շարժվող եւ անշարժ, ՀՀ-ինն ա»,- հայտարարեց նա:

Ըստ գեներալի` օրինակ, մեկ ամիս անց բոլորը փոխվելու են, նաեւ` վարչապետը, հետո` չթշնամանալու կոչ արեց ու ասաց. «Վաղը, մյուս օրը տղա, աղջիկ ունեք, իրար հետ պսակելու եք, բարեկամանաք»:

Գրիգորյանի այս արտահայտությանը մեծ ուրախությամբ արձագանքեց ԱԺ նախագահը եւ նշեց, որ մարդիկ ժամանակի ընթացքում են փոխվում: Մանվել Գրիգորյանն այնքան էր ոգեւորվել իր իսկ ելույթով, որ ԱԺ ամբիոնից հեռացավ ԱԺ նախագահի հորդորից հետո միայն` հայտարարելով. «Լավ, քու խաթեր եմ գնում»:

Օրենքի նախագիծն ընդունվեց ձայների` 99 կողմ, 0 դեմ, 0 ձեռնպահ հարաբերակցությամբ, որից հետո երկար ծափահարություններ հնչեցին:

Ուշագրավ է, որ ԱԺ ՀՀԿ խմբակցության պատգամավոր Հրանտ Գրիգորյանը` Մանվել Գրիգորյանի եղբորորդին, ԱԺ դահլիճ մտավ միայն գեներալ-պատգամավորի ելույթից հետո: