''Այ թի Մաստեր'' եւ ''Nout.am'' ընկերությունները տուգանվեցին

Համակարգչային տեխնիկայի իրացմամբ զբաղվող «Այ թի մաստեր» եւ «Nout.am» ընկերությունները ՀՀ տնտեսական մրցակցության պաշտպանության պետական հանձնաժողովում այսօր տեղի ունեցած նիստում կայացված որոշմամբ տուգանվել են սպառողներին մոլորեցնելու համար. տեղեկացնում է ՀՀՏՄՊՊՀ մամուլի եւ հասարակության հետ կապերի վարչությունը:

Հանձնաժողովը մի շարք քաղաքացիներից դժգոհություն է ստացել այն մասին, որ «Այ թի մաստեր» և «Nout.am» ընկերությունները ակնհայտորեն խաբում և մոլորեցնում են սպառողներին: Խնդիրն այն է, որ նշված ընկերությունները գովազդում են այնպիսի ծառայություններ, որոնք չեմ մատուցվում:

Մասնավորապես` «Nout.am» անվանումով համակարգչային տեխնիկայի խանութ-սրահի մուտքի մոտ փակցված է գովազդային վահանակ՝ «Ապառիկ` տեղում, միայն անձնագրով, 0% կանխավճար» բովանդակությամբ: Սակայն Հանձնաժողովի կողմից իրականացված դիտանցմամբ պարզվել է, որ այն իրականությանը չի համապատասխանում:

Նույն կերպ` «Այ թի մաստեր» ընկերությունը ևս հաճախորդներին չի տրամադրում համակարգիչներ այն պայմաններով, ինչպիսիք ներկայացնում է գովազդում: Ընկերությունների նման վարքագիծը Հանձնաժողովը որակել է որպես անբարեխիղճ մրցակցության դրսևորում և կիրառել տուգանք՝ յուրաքանչյուրի նախորդ տարվա հասույթի 1 տոկոսի չափով, ինչն օրենքով նախատեսված առավելագույն պատժաչափն է:

Ընկերությունները նախազգուշացվել են զերծ մնալ նման գործելաոճից և անհապաղ վերացնել խախտումը: