Սյունիքի մարզպետն անգնահատելի ֆիգուր էր իշխանությունների համար. Ստյոպա Սաֆարյան

Հայաստանում չկա որեւէ ողջամիտ մարդ, ով չսպասեր, որ Սյունիքի մարզպետի բոլոր «քաջագործությունների»` անպատժելիությամբ խրախուսումը նման հետեւանքների էր հանգեցնելու. Գորիսում տեղի ունեցած միաջադեպի մասին yerkir.am-ին այսօր ասաց «Ժառանգության» ներկայացուցիչ Ստյոպա Սաֆարյանը:

Նա համոզմունք հայտնեց, որ բոլորը հասկանում էին, որ մի օր այդ ամենը շատ վատ ավարտ է ունենալու:

«Նախադեպերը շատ են: Պարզապես, քանի որ Սյունիքի մարզպետն անգնահատելի ֆիգուր է իշխանությունների համար` թե’ ընտրությունները կեղծելու, թե’ Սյունիքում բռնատիրություն հաստատելու առումով, բնականաբար, ոչ թե նա էր իշխանության պարտքի տակ, այլ իշխանություններն էին նրա պարտքի տակ եղել մշտապես: Հետեւաբար, այսպիսի մի բան պետք է լիներ, եւ հիմա էլ շատ քիչ կասկածներ ունեմ, որ նրան կպատժեն: Ակնհայտ է, որ նրան արանքից հանում են»,- ասաց Ստյոպա Սաֆարյանը` նշելով, որ արդեն իսկ նկատելի է, որ հրապարակ են նետվում տեսակետներ, թե նա քնած է եղել, ու այն տպավորություն են փորձում ստեղծել, թե նրա որդին ու թիկնապահն ինքնագլուխ են գործել. ինքը բացարձակ տեղյակ չի եղել:

«Ապահով Հայաստան» կարգախոսի ներքո էլ այս միջադեպը Ստյոպա Սաֆարյանը ոչ մի կերպ չի դիտարկում, քանի որ ի սկզբանե ՀՀԿ-ի «Ապահով Հայաստան» կարգախոսը չի ընկալել: ՀՀԿ-ն հենց ինքը, նշեց մեր զրուցակիցը, մեր երկիրն անապահով է դարձրել, հետեւաբար, ինքն առանձնապես սպասելիքներ չունի, որ այն պետք է ապահով լինի:

«Մենք այս օրերի ընթացքում բազմաթիվ սկանդալներ ենք տեսնում` աղմկահարույց: Դրանցից`  վարչապետի, Կճոյանի, Աշոտ Սուքիասյանի եւ Փայլակ Հայրապետյանի գործը, Գյումրու դեպքը եւ այլն, այսինքն` մենք ռեժիմի դեմքն ամեն մի փոքրիկ միջադեպով էլ տեսնում ենք` քցող, հալածող եւ այլն»,- ասաց Սաֆարյանը եւ շարունակեց, որ Սյունիքի մարզպետի գոյությունն իր պաշտոնում տարիներ շարունակ եղել է հիասթափության պատճառ շատ ու շատ նորմալ, արժանապատիվ մարդկանց համար:

«Սա ընդամենը ինչ-որ էլեկտրաշոկի էֆեկտ էր` վայրկյանական` ավելի լայն շրջանակների վրա ազդելու առումով: Բայց, ընդհանուր առմամբ, բոլոր գիտակից մարդիկ հրաշալի հասկացել են, թե ովքեր են այս երկրի կառավարիչները: Մի օր ցավալի միջադեպի մասին մարդիկ լսում են բանակից, մի օր` մարզպետից, մի օր` վարչապետից… Իհարկե, սա տոտալ նեխման մասին է խոսում, այսինքն` համակարգը ներսից նեխել է արդեն: Եվ համակարգի, բուրգի վերեւում կատարելապես բարոյազուրկ, հանցածին խմբավորումն է»,- նշեց «Ժառանգության» ներկայացուցիչը: