Չէի ասի, որ մյուսները Զառա Արամյանից ավելին են արել. Ստյոպա Սաֆարյան

Տեղեկացրել էինք, որ քաղաքապետարանը բնակարան կնվիրի հաղորդավար, դերասանուհի Զառա Արամյանին, երգիչ-երգահան Դավիթ Ամալյանին, գրող Վահրամ Սահակյանին և Ալ. Սպենդիարյանի անվան օպերայի և բալետի ազգային ակադեմիական թատրոնի մեներգիչ Բերջ Քարազյանին:

Yerkir.am-ի հետ զրույցում Երևանի ավագանու անդամ Ստյոպա Սաֆարյանը նշեց, որ սա առաջին դեպքը չէ. սկսած ոչ հայտնի դեմքերից, վերջացրած մշակույթի գործիչներով` Երևանի ավագանին մշտապես նվիրատվություն է արել: Ըստ Սաֆարյանի` «Բարև Երևանը» միշտ նկատի է ունեցել այն, թե որքանով են այդ նվիրատվությունների համար ապահովված պատշաճ փաստաթղթային հիմքերը:

«Մտավորականների դեպքում մենք շատ ընտրողաբար ենք նայում հարցին, այսինքն` պետք է հաշվի առնվի, թե ով ունի դրա կարիքը` առավելապես: Եղել են դեպքեր, որ մենք հարց ենք բարձրացրել` որքանո՞վ են դրանք տեղին կամ ոչ, բայց եղել են դեպքեր, որ մենք գիտակցել ենք, որ նրանց, իսկապես, կարելի է նման ձևով խրախուսել: Հիմա ես դեռևս ծանոթ չեմ այդ ներկայացված մարդկանց կարիքներին, դրա համար էլ հստակ չեմ կարող ինչ-որ բան ասել: Չեմ բացառում, որ ոմանք կունենան դրա կարիքը»,- ասաց ավագանու անդամը:

Հարցին, թե «Ֆեյսբուք»-ում քննադատության է արժանացել այն, որ Զառա Արամյանին նույնպես բնակարան շնորհելու հրաման է ներկայացվել, Սաֆարյանը պատասխանեց, որ համաձայն չէ քննադատությունների հետ:

«Ես այնքան համաձայն չեմ, քանի որ ամեն մեկի հանդեպ էլ կարող ենք կարծիք հայտնել, թե ով ինչ է արել կամ ինչ չի արել: Զառա Արամյանը, համենայն դեպս, և՛ դերասանուհի է, և՛ հաղորդավար: Վերանալով ամեն ինչից` չէի ասի, որ մյուսներն Արամյանի ֆոնի վրա ավելին են արել: Դա իմ քննարկելու խնդիրը չէ, ես մշակութաբան չեմ, որ գնահատեմ` ով ինչ է արել մշակույթի համար, բայց, համենայն դեպս, գիտեմ, որ նա ֆիլմերում դերեր էլ է խաղացել, այնպես որ` չէի ասի, որ որևէ վաստակ չունի մշակույթում»,- ասաց Սաֆարյանը:

Նա նշեց, որ խնդիրն այլ `` ստացողներն, իրո՞ք, ունեն բնակարանի կարիք: Ըստ Սաֆարյանի` եթե իրենք պարզեն, որ, իսկապես, դա նրանց համար հերթական բնակարանն է լինելու, դեմ կարտահայտվեն: ««Բարև Երևանը» հայտարարել է, որ Երևանի ավագանին և քաղաքապետարանը պետք է ծայրահեղ անհրաժեշտություն ունեցողներին բնակարան նվիրաբերեն: Եթե մենք լինեինք իշխանություն, մենք այլ մոտեցում և քաղաքականություն կունենայինք, ինչը չի նշանակում` արվեստի գործիչներին չէինք խրախուսի: Պարզապես այդ ամենը կարելի է անել ավելի համոզիչ հիմնավորումներով, որպեսզի հասարակության շրջանում կասկածներ չլինեն որոշման վերաբերյալ»,- ասաց նա: