ՍԴ դիմում ենք, որ հետո չասեն` ինչու չդիմեցիք. Ստյոպա Սաֆարյան

Իշխանությունն այս ընտրություններում միայն մի հարցում չի սխալվել` ընտրություներում պայքարն ընթացել է երկրորդ տեղի համար, եւ այդ տեղի համար պայքարում էր Սերժ Սարգսյանը. լրագրողների հետ հանդիպման ժամանակ հայտարարեց ԱԺ «Ժառանգություն» կուսակցության քարտուղար Ստյոպա Սաֆարյանը:

Անդրադառնալով ընտրությունների վերաբերյալ ԵԱՀԿ միջանկյալ զեկույցին` նա ասաց. «Զեկույցում, բառի բուն իմաստով, կասկածի տակ է դրվում Սարգսյանի հաղթանակը: Միջազգային որևէ զեկույց  այդքան թափանցիկ չի արտահայտում ընտրությունների կեղծված լինելը, որքան սա»:

Ընդգծելով հետընտրական շրջանի աննախադեպ լինելը` Սաֆարյանը փաստեց, որ Րաֆֆի Հովհաննիսյանի պայքարը դուրս է եկել Ազատության հրապարակի տիրույթներից և բուռն արձագանք գտել մարզերում:

 «Ի տարբերություն Լևոն Տեր-Պետրոսյանի, Րաֆֆի Հովհաննիսյանը  բաց է պահում քաղաքական դաշտի բոլոր ուղիները և բանակցության պատրաստակամություն հայտնում բոլոր քաղաքական ուժեր հետ»,- ասաց նա և հավելեց, որ Րաֆֆի Հովհաննիսյանը դասեր է քաղել անցյալից:

Սաֆարյանը նշեց, որ ինքը թեև չի վստահում Սահմանադրական դատարանին, սակայն կողմ է ընտրությունների կեղծվելու փաստով ՍԴ դիմելու` Րաֆֆի Հովհաննիսյանի որոշմանը. «Դիմում ենք, որ հետո չասեն` ինչու չդիմեցիք»: