Ասադը այսօր, ինչպես նախկինում, աջակցություն ունի իր երկրում. Էդվարդ Նալբանդյան

Սիրիայի նախագահ Բաշար Ասադը այսօր, ինչպես նախկինում, աջակցություն ունի իր երկրում, եւ Հայաստանը չի կարող հաշվի չառնել այդ փաստը: Այս մասին այսօր ԵԽԽՎ Մշտական հանձնաժողովի եւ Բյուրոյի նիստի ժամանակ հայտարարել է Հայաստանի արտգործնախարար Էդվարդ Նալբանդյանը` պատասխանելով սիրիական ճգնաժամի կապակցությամբ Երեւանի դիրքորոշման վերաբերյալ հարցին. տեղեկացնում է Regnum գործակալությունը:

«Այս բարդ իրավիճակում, երբ Սիրիայում քաղաքացիական պատերազմ է, մենք պետք է հաշվի առնենք, ինչպես նախագահ Ասադի, այնպես էլ ընդդիմության կողմնակիցների կարծիքը: Իրադրությունը շատ բարդ է»,- ընդգծել է նախարարը:

Նրա կարծիքով` Սիրիայի քաղաքացիների մեծ մասը չի պաշտպանում ընդդիմությանը, քանի որ իրավիճակը պայթյունավտանգ է, եւ մարդիկ երկյուղում են երկրի ապագայի կապակցությամբ:

Նալբանդյանը հիշեցրել է, որ Սիրիայի հայկական համայնքը մինչեւ պատերազմը 120 հազար ներկայացուցիչ ուներ, իսկ ներկայումս մնացել են ընդամենը 40 հազարը, եւ, չնայած վտանգին, Սիրիայում Հայաստանի հյուպատոսությունը շարունակում է գործել:

Հայաստանի արտգործնախարարը համարում է, որ հունիսի սկզբին նախատեսվող` Սիրիայի հարցով երկրորդ ժնեւյան համաժողովում անհրաժեշտ է ամեն ջանք գործադրել` զինված գործողությունների դադարեցման համար: Ըստ նրա` միջազգային հանրությունը պետք է դասեր քաղի Ժնեւի առաջին համաժողովի տապալումից եւ չկրկնի նույն սխալները: