ԼՂՀ համաձայնությունից հետո միայն հնարավոր կլինի մշակել խաղաղության պայմանագիրը. Էդվարդ Նալբանդյան

Բազելում լրագրողների հետ ճեպազրույցի ժամանակ ՀՀ արտաքին գործերի նախարար էդվարդ Նալբանդյանը, պատասխանելով այն հարցին, թե  ե՞րբ են լինելու հաջորդ բանակցությունները, ասել է.

«Բանակցություններին այլընտրանք չկա։ Դա է մեր սկզբունքային դիրքորոշումը։

Այս բավական բարդ իրավիճակը, որ ստեղծվել է ուղղաթիռի խոցման և Ադրբեջանի կողմից սադրանքների հետևանքով, լրացուցիչ քայլեր է պահանջում՝ բարենպաստ պայմաններ ստեղծելու բանակցություններն առաջ տանելու նպատակով։

Ադրբեջանն իր սադրիչ հայտարարարություններով, իր գործողություններով, չի նպաստում այդպիսի պայմանների ստեղծմանը, տրամագծորեն հակառակն է անում: Այս շրջանում առաջին հերթին ջանքերը պետք է ուղղվեն բանակցությունների համար համապատասխան, գոնե մինիմալ պայմանների ապահովմանը»:

Այն դիտարկմանը,  որ  վերջին հայտարարությունում  կողմերին կոչ է արվել համապարփակ համաձայնություն նախապատրաստել, որը, կարծես, համահունչ է այն ձևակերպմանը, որի մասին պարբերաբար նշում է Մամեդյարովը, Էդվարդ Նալբանդյանը նշել է.

«Դա այդքան էլ այնպես չէ, ինչպես որ ասում է Մամեդյարովը, նա այդպես մեկնաբանում է, փորձում է ներկայացնել իր ցանկացածը` որպես իրականություն: Եռանախագահները առաջին հերթին հղում են կատարում հայտնի հինգ հայտարարություններին: Իսկ ի՞նչ է ասվում եռանախագահող երկրների ղեկավարների այդ հինգ հայտարարությունների մեջ` պետք է արագացնել համաձայնության ձեռք բերումը հիմնարար սկզբունքների շուրջ, ինչը հնարավորություն կտա սկսել համապարփակ խաղաղության պայմանագրի մշակումը:

Երբ համաձայնություն ձեռք բերվի հիմնարար սկզբունքների վերաբերյալ, և դրան իր համաձայնությունը տա նաև Լեռնային Ղարաբաղը, այդ ժամանակ հնարավոր կլինի բանակցություններ սկսել Ադրբեջանի, Ղարաբաղի և Հայաստանի միջև՝ մշակելու խաղաղության համապարփակ պայմանագիրը։