Համաշխարհային մակարդակի եւ արդի տեխնիկայով հագեցած թատրոն

Ալեքսանդր Սպենդիարյանի անվան օպերայի եւ բալետի ազգային ակադեմիական թատրոնի բեմի արդիականացման աշխատանքներն ավարտվել են:

Ազգային ակադեմիական թատրոնի տնօրեն Կամո Հովհանիսյանը yerkir.am-ի հետ զրույցում նշեց, որ վերանորոգման եւ բեմի արդիականացման աշխատանքների վրա ծախսվել է շուրջ 8 միլիոն եվրո:

«Բեմի մեխանիկական համակարգերում լիովին արդիականացվել են շարժիչները, փոխվել համակարգերը, ճոպանաճախարակային բոլոր հանգույցները, ներմուծվել է նոր համակարգչային կառավարման համակարգ: Ներկայացումների մեխանիկական բոլոր ծրագրերը կարող են պահպանվել առանց հիշողության թարմացվելու»,- ուրախությամբ նշեց Հովհաննիսյանը եւ հավելեց, որ ձայնահնչյունային եւ լուսային համակարգերը նույնպես արդիականացվել են. «Ավելացել է շուրջ 400 լուսարձակ, համակարգերը արդիականացվել են նոր սերնդի տեխնիկայով, ուժեղացուցիչներով, բարձրախոսներով, տարաբնույթ խոսափողներով` երաժշտական գործիքներ»:

Հովհաննիսյանը նշեց, որ այժմ հպարտությամբ կարող է փաստել, որայսօր ունենք համաշխարհային մակարդակի` արդի տեխնիկայով հագեցած թատրոն:

Ի դեպ, բեմի վերազինման աշխատանքներն իրականացրել է ավստրիական «Վագներ-Բիրո Աուստրիա Ստեյջ Սիստեմս Էյ Ջի» կազմակերպությունը, որը նման գործունեության 150-ամյա փորձ ունի Լոնդոնի, Վիեննայի, Սիդնեյի, Մոսկվայի թատրոններում: Վերջին անգամ թատրոնը վերանորոգվել էր 2001-2003-ին` «Լինսի» հիմնադրամի ֆինանսավորման ծրագրի շրջանակում, սակայն` մասնակիորեն: