Կանաչապատում` տեխնիկայով

Մայրաքաղաքի կանաչապատման ծավալները ավելացնելու և աշխատանքը առավել արդյունավետ կազմակերպելու նպատակով, Երևանի քաղաքապետի հանձնարարությամբ, ներկրվել է հատուկ նշանակության 500 սարքավորում` խոտհնձիչներ, թունաքիմիկատների ներարկման մեխանիզմներ, փորող-փխրեցնող գործիքներ, էլեկտրա- և բենզասղոցներ և այլն:

Կանադայից ներկրվել է նաև բեռնատար, որի թափքում տեղադրված համակարգերը ծառը բնարմատով ու բնահողով մեկ տեղից մեկ այլ տեղ տեղափոխելու հնարավորություն են տալիս:

Սարքավորումները, ըստ նախապես ներկայացված հայտերի, կբաժանվեն վարչական շրջաններին, որոնք էլ, իրենց հերթին, դրանց մի մասը կտրամադրեն Երևանի քաղաքապետարանի ենթակայության դպրոցներին, նախադպրոցական կրթական հաստատություններին և համատիրություններին:

Շուտով Երևան կհասնի նաեւ 400 նմանատիպ սարքավորումների երկրորդ խմբաքանակը. տեղեկացնում է քաղաքապետարանի տեղեկատվության եւ հասարակայնության հետ կապերի վարչությունը: