Ո՞վ պետք է ապահովի Միասնական քննչական մարմնին անհրաժեշտ տեխնիկայով

Այսօր ՀՀ արդարադատության նախկին նախարար, Սահմանադրական դատարանի նախագահի խորհրդական Գևորգ Դանիելյանը Միասնական քննչական մարմնի վերաբերյալ օրենքի նախագծի քննարկման ժամանակ Միասնական քննչական մարմնի կազմավորման իրավական ապահովման հանձնաժողովի նախագահ Աղվան Հովսեփյանից հետաքրքրվեց` կազմավորվելիք մարմինը տեխնիկապես հագեցած լինելո՞ւ է, թե՞ ոչ:

Ըստ նրա` կազմավորվելիք մարմնում միայն քննիչների աշխատավարձերը բարձրացնելով` արդյունքի չեն հասնի. Տեխնիկական հագեցվածության պակասը կհանգեցնի նրան, որ քննիչների համար նոր համակարգը ևս հրապուրիչ չի լինի:

«Քննչական մարմինը նյութատեխնիկական առումով ապահովելու հարցը քննարկվել է, այն մտահոգում է մեզ և մեր երկրի ղեկավարությանը»,- պատասխանեց Աղվան Հովսեփյանը և հավելեց, որ ՀՀ նախագահ Սերժ Սարգսյանը կառավարությանը հանձնարարել է` ապահովել Կոմիտեին շենքային պայմաններով և նյութատեխնիկական բազայով:

Քննարկման ժամանակ Երևանի պետական համալսարանի իրավագիտության ֆակուլտետի դեկան Գագիկ Ղազինյանը համոզմունք հայտնեց, որ այս կառույցը ժամանակի ընթացքում միավորելու է բոլոր քննչական մարմինները: