Ուսանողներն այլեւս չեն աշխատում Սերժ Սարգսյանի եղբոր այգում

Ապրիլի 11-ին «Հայկական ժամանակ» թերթում տպագրված «Ուսանողները Սերժի եղբոր այգո՞ւմ» հրապարակման հենց հաջորդ օրվանից՝ Ագրարային համալսարանի ագրոնոմիական ֆակուլտետի 4-րդ կուրսում սովորողներն այլևս չեն աշխատում այդ այգում:

Այս փաստը «ՀԺ» թղթակցի հետ զրույցում հաստատել են նշված բուհից: Հրապարակման մեջ գրել էին, որ այգին, թերթի տեղեկություններով, ծիրանի է և զբաղեցնում է 40 հեկտար տարածք, որտեղ ըստ պաշտոնական բացատրության, ուսանողներն աշխատում էին արտադրական պրակտիկայի շրջանակներում:

Երեկ բուհից պարզաբանել են նաև, թե ինչու ուսանողներին այլևս չեն տանում այդ այգի:

«Դա պայմանավորված է այն հանգամանքով, որ ծիրանի այգու հետ կապված հետաքրքրող թեմատիկան արդեն սպառվել է և ուսանողներին բացատրելու, ցուցադրելու նյութ այստեղ այլևս չկար»,-եղել է պարզաբանումը:

Փաստորեն, նշում է թերթը, հրապարակման հաջորդ օրն իսկ ուսանողներին բացատրելու նյութն այգում սպառվել է: