Մերաբիշվիլին որոշել է սպանել Սահակաշվիլիին. վրացական ԶԼՄ

Վրաստանում պատրաստվում են սպանել նախագահ Միխեիլ Սահակաշվիլիին, ընդ որում` նրան ցանկանում է վերացնել նրա վաղեմի գործընկեր ու համախոս, ՆԳ նախկին նախարար Վանո Մերաբիշվիլին: Ի դեպ, սպանության մեղքն էլ ցանկանում են բարդել Ռուսաստանի, նաեւ Վրաստանի նոր ղեկավարության վրա. կարդում ենք Грузия и мир կայքում, որը վկայակոչում է Хроника թերթը:

«Սպանված նախագահը հերոս կդառնա, իսկ Մերաբիշվիլին` «վերածնված կուսակցության միահեծան առաջնորդը»,- գրում է պարբերականը` հավելելով, որ ավելի վաղ Մերաբիշվիլին այդ մասին հայտնել է նախագահին` նրան վստահեցնելով, որ դա «բեմականացում է» լինելու: «Դու ողջ կմնաս: Մենք մեծ աժիոտաժ կառաջացնենք աշխարհում, կուսակցություն ոտքի կկանգնի: Ամեն ինչում կմեղադրեն ռուսներին: Մենք մեծ խնդիրներ կառաջացնենք Իվանիշվիլիի համար»,- նախագահին իբր ասել է Մերաբիշվիլին:

Ըստ թերթի` Սահակաշվիլին իբր հավանություն է տվել ծրագրին, սակայն հետագայում նրա շրջապատը հետ է պահել նրան այդ քայլից` զգուշացնելով, որ մահը կարող է նաեւ իրական լինել:

Թերթը գրում է, որ տեղեկատվությունը ստացել է նախագահի անվտանգության ծառայության նախկին աշխատակցից, իսկ հրապարակում է, որ կասեցնի նախապատրաստվող հանցագործությունը, քանի որ Մերաբիշվիլին իր ծրագրից չի հրաժարվել:

Սահակաշվիլիի եւ նրա կողմնակիցների արձագանքը հոդվածին դեռեւս չի ստացվել: