Սամվել Ալեքսանյանի կարծիքով` Տարոն Մարգարյանը կհաղթի

Արդեն տեղեկացրել ենք, որ Երեւանի ավագանու ընտրությունների պաշտոնական քարոզարշավը ՀՀԿ-ն սկսեց Մալաթիա-Սեբաստիա վարչական համայնքից: Գործող քաղաքապետի քարոզարշավին հետեւում էր նաեւ Մալաթիա-Սեբաստիա համայնքն ընդգրկող թիվ 7 ընտրատարածքից մեծամասնական ընտրակարգով ընտրված պատգամավոր Սամվել Ալեքսանյանը:

Yerkir.am-ի հետ փոքր զրույցում պատգամավորը հայտնեց, որ, իր կարծիքով, Տարոն Մարգարյանը կհաղթի եւ կրկին քաղաքապետ կդառնա: Դիտարկմանը, թե ինչո՞ւ է այդպես կարծում, նա արձագանքեց. «Որովհետեւ լավ քաղաքապետ է»:

Ալեքսանյանը հայտարարեց նաեւ, որ աջակցելու է Տարոն Մարգարյանին: Հարցին` ֆինանսապե՞ս, թե՞ բարոյապես, պատգամավորը չպատասխանեց: