''Բարև Երևան'' դաշինքը քարոզարշավը կսկսի օմբուդսմենի մոտից

«Բարև Երևան» դաշինքի նախընտրական շտաբի լրատվական ծառայությունը հաղորդագրություն է տարածել, որում նշվում է, որ դաշինքը մայիսի 5-ին կայանալիք Երևանի ավագանու ընտրությունների՝ ապրիլի 7-ին մեկնարկող քարոզարշավը կսկսի Պուշկին-Եկմալյան փողոցների խաչմերուկում (Մարդու իրավունքների պաշտպանի գրասենյակի դիմաց) գտնվող փոքրիկ պուրակից։

Ըստ հաղորդագրության՝ այնտեղ, ժամը 15:00-ին «Բարև Երևան» դաշինքի ցուցակի անդամները մաքրելու ու ծաղկապատելու են տարածքը:

«Հիշեցման կարգով նշենք, որ այս պուրակում 2007թ.-ին քաղաքապետի թողտվությամբ պետք է ապօրինի կառուցապատում իրականացվեր, ինչը կանխվեց շրջակա շենքերի բնակիչների և ԱԺ «Ժառանգություն» խմբակցության պատգամավորների համատեղ պայքարի արդյունքում. պատգամավորներ, ովքեր այժմ «Բարև Երևան» դաշինքի առաջատարներն են»,– ասվում է հաղորդագրությունում: