Շվեյցարացին միտումնավոր ՁԻԱՀ-ով էր վարակել իր հիվանդներին

Շվեյցարացի տղամարդը դատարանի առջև է կանգնել իր հիվանդներին դիտավորյալ վարակելու համար: Նա ինքնակոչ կենսաէներգաթերապևտ է եղել և ասեղնաբուժությամբ է զբաղվել. հաղորդում է Fox News-ը:

Բեռնի դատախազությունը տղամարդուն մեղադրում է մի քանի մարդու առողջությանը ծանր վնաս հասցնելու մեջ:  Նման մեղադրանքի դեպքում մարդը կարող է դատապարտվել 5-10 տարվա ազատազրկման:

Դատախազության հրապարակած տվյալներով` տուժողների մեծամասնությունը երաժշտական դպրոցի ուսանողներ են: 2001-2005 թվականներին մեղադրյալը կեղծ ասեղնաբուժության սեանսեր է անցկացրել: Նա հաճախորդներին քնեցրել է, այնուհետեւ ՁԻԱՀ-ով վարակված ասեղներ մտցրել նրանց մարմնի մեջ: Մեղադրյալն իրեն առաջադրված մեղադրանքը չի ընդունում:

Գործը բացահայտվել է այն բանից հետո, երբ Բեռնի հիվանդանոց են գնացել միևնույն վարակային ախտանշաններով մարդիկ, ու պարզվել է, որ բոլորն էլ նույն «բժշկի» ձեռքի տակով են անցել: