Դատարանում Վազգեն Խաչիկյանի համար ''լավ տեղ'' էին պահել

Սովորաբար, դպրոցում գերազանց առաջադիմություն ունեցող կամ լավ վարքագիծ դրսևորող աշակերտներին ուսուցիչները նստեցնում են առաջին շարքում: Այն որոշ աշակերտների համար առաջինը լինելու կամ մյուսներից առանձնանալու չափանիշ է:

Մոտավորապես նման իրավիճակ էր ստեղծվել այսօր Աջափնյակ և Դավթաշեն ընդհանուր իրավասության դատարանում  ՀՀ աշխատանքի և սոցիալական հարցերի նախարարության սոցիալական ապահովության պետական ծառայության նախկին պետ Վազգեն Խաչիկյանի և մյուսների գործով դատական նիստին:

Գործը գտնվում է Կենտրոն և Նորք-Մարաշ վարչական շրջանների  ընդհանուր իրավասության դատարանի վարույթում և մինչ այժմ քննվել է այնտեղ:  Սակայն այդ դատարանի դահլիճները համեմատաբար փոքր էին նման մեծածավալ գործի քննությունն իրականացնելու համար: Մինչ այս  պաշտպանները դժգոհում էին, որ մի կերպ են տեղավորվում, ավելին` իրենց պաշտպանյալներից հեռու են գտնվում, ինչը խոչընդոտող հանգամանք է նիստի բնականոն ընթացքն ապահովելու համար: Դա էր պատճառը, որ դատավոր Մխիթար Պապոյանը որոշել էր սույն գործով նիստերն անցկացնել Աջափնյակի դատարանում:

Այսօրվա նիստին պետական բարձրաստիճան նախկին պաշտոնյաները հարմարավետ տեղավորեցին ամբաստանյալների աթոռներին: Սոցիալական ապահովության ծառայության տարածքային բաժինների նախկին ղեկավարները զբաղեցրեցին վերջին շարքը,  երկրորդ շարքում էին Սոցիալական ապահովության վարչությունների նախկին ղեկավարները: Իսկ պատվավոր` առաջին շարքում էր Սոցիալական ապահովության ծառայության պետ Վազգեն Խաչիկյանն` իր պաշտպանի հետ: Խաչիկյանին առաջին շարքում էին նստեցրել` գուցե հաշվի առնելով սոցիալական ապահովության ոլորտում նրա անգնահատելի «վաստակն» ու սերունդներին թողած զգալի «ավանդը»:

Արդյո՞ք ամբաստանյալների նորամուտը Աջափնյակի դատարան «խերով» է, պարզ կդառնա դատաքննության ավարտին, իսկ նախքան այդ տեսնենք, թե նախկին պաշտոնյան իրեն առաջադրված մեղադրանքն ընդունո՞ւմ է թե՞ ոչ:  Խաչիկյանի պատասխանը դիտեք տեսանյութում: