Ֆրանսիական խմբի ստեղծումը պատ չէ որեւէ ազգի, ժողովրդի դեմ. ԼՂՀ ներկայացուցիչ

Արդեն տեղեկացրել ենք, որ երեկ Ֆրանսիայում մի խումբ ազդեցիկ քաղաքական գործիչների կողմից ստեղծվել է Արցախի հետ բարեկամական շրջանակ (խումբ): Այս կապակցությամբ yerkir.am-ը զրուցեց Ֆրանսիայում ԼՂՀ  մշտական ներկայացուցիչ Հովհաննես Գեւորգյանի հետ:

-Պարո'ն Գեւորգյան, տեղեկացանք, որ Ֆրանսիայում Արցախի հետ բարեկամական խումբ է ստեղծվել: Կասե՞ք, թե ի՞նչ է այն իրենից ներկայացնում, ովքե՞ր են խմբի անդամները:

- Սա ֆրանսիացի քաղաքական գործիչների նախաձեռնությունն է, որոնք ներկայացնում են Ֆրանսիայի քաղաքական շրջանակները, ինչը շատ ուրախալի փաստ է: Այն ֆրանսիացի քաղաքական գործիչները, ովքեր ցանկություն են հայտնել ստեղծել ԼՂՀ-ի հետ բարեկամության այս շրջանակը, հղում են կատարել այնպիսի համամարդկային արժեքների, ինչպիսիք են ազատությունը եւ ժողովրդավարությունը: Խմբի ստեղծումը բավականին խնդիրներ է լուծելու, քանի որ այն, բնականաբար, անդրադառնալու է Արցախի ճանաչմանը, առկա խնդիրների լուծմանը եւ ավելի մոտիկից այդ խնդրի ծանոթացմանը, մանավանդ` Ֆրանսիայի տարածքում:

- Վերջին շրջանում, կարծես, ակտիվացել են ԼՂՀ-ի ճանաչման աշխատանքները: Որքանո՞վ կարող ենք հավակնել, որ այս խումբը կդառնա պաշտոնական խումբ:

-Իհարկե, մենք մեծ ոգեւորվածությամբ տեղեկացանք, որ վերջերս Լիտվիայի Հանրապետությունում ստեղծվել է բարեկամական նման խումբ: Փաստորեն, այս կերպ Ֆրանսիայի քաղաքական գործիչներն իրենց ցանկությունը հայտնեցին համագործակցել այլ երկրների ներկայացուցիչների հետ, որոնք Արցախի ժողովրդի կողմից են, պաշտպանում են նրանց որդեգրած արժեքները: Մենք փորձելու ենք կապեր հաստատել Արցախով հետաքրքրվող այլ քաղաքական անձանց հետ եւս եւ, նրանց միմյանց հետ ծանոթացնելով, ամուր կապեր ստեղծել:

-Վալերի Բուայեից բացի, ովքե՞ր են նախաձեռնողների թվում:

-Շատ ուրախալի է, որ բոլոր այդ անձինք կիսում են նույն արժեքները: Բոլորը, ովքեր երեկ ստորագրել են հայտարարության տեքստը, ակտիվ դերակատարություն են ունեցել խմբի շրջանակից դուրս էլ: Նրանք ԱԺ պատգամավորներ են, նախկին պատգամավորներ, քաղաքապետեր: Ահա նրանց անունները` Ռոլան Բլում` Մարսելի փոխքաղաքապետ, Ժորժ Կոլոմբիե` նախկին պատգամավոր, Վալերի Բուայե` պատգամավոր, Բեռնար Ֆուրնիե` սենատոր, Սոֆի Ժուասեն, սենատոր, Ռիշար Մալի` նախկին պատգամավոր, Ֆիլիպ Մարինի` սենատոր, Ժակ Ռեմիլե` նախկին պատգամավոր, Վիենի քաղաքապետ, Ֆրանսուա Ռոշբլուան` պատգամավոր, Ռենե Ռուքե` պատգամավոր, Գի Տեսիե` պատգամավոր: Օրինակ` Ռոլան Բլումը քաջատեղյակ է Արցախյան հիմնախնդրին, քանի որ մինչեւ անցյալ տարի նա ԵԽ Խորհրդարանական վեհաժողովում Հարավային Կովկասի եւ, մասնավորապես, Արցախի մասով զեկուցողն էր:

- Արդյո՞ք այս խումբը մոտ ապագայում կարող է այցելել ԼՂՀ, եւ ի՞նչ է արվելու ադրբեջանական կողմի հնարավոր բացասական արձագանքի դեպքում:

- Այս քաղաքական գործիչների գերակշիռ մասն արդեն եղել է Արցախում եւ ծանոթ է արցախյան իրականությունը: Այս ծրագրի նպատակներից մեկն էլ ֆրանսիացի քաղաքական գործիչների տեղեկատվական այցը ԼՂՀ կազմակերպելն է` տեղում իրավիճակին ծանոթանալու համար: Բնականաբար, առաջնությունը կտրվի նրանց, ովքեր դեռ չեն այցելել Արցախ, թեեւ բոլորի մոտ մեծ ցանկություն կա կրկին այցելել Արցախ: Տեղյակ չեմ, թե ինչպիսին է եղել  ադրբեջանական իշխանությունների արձագանքը, բայց կուզեի ընդգծել, որ նման շրջանակի ստեղծումը պատ չէ որեւէ ազգի, ժողովրդի դեմ: Սա ԼՂՀ-ին, տեղի ժողովրդին սատարող խումբ է, ԼՂՀ-ի ժողովրդի եւ իշխանությունների պայքարին նեցուկ կանգնելու եւ տեղեկատվական առումով էլ ավելի հասանելի դարձնելու համար է: Այն պետական կամ ոչ պետական ինչ-որ խմբի դեմ չի ստեղծվել: