Հնդկաստանում դեմ են ԱԷԿ-ի գործարկմանը

Ավելի քան 2500 մարդ ծովից փորձել է խոչընդոտել Ռուսաստանի աջակցությամբ Հնդկաստանի Թամիլնադ նահանգում կառուցվող «Կուդանկուլամ» ատոմակայանի շինարարությանը: Ակցիան իրականացվել է երեկ` ճապոնական «Ֆուկուսիմա-1» ատոմակայանի վթարի տարելիցի օրը. տեղեկացնում է РИА Новости-ն:

Ցուցարարները 500 նավակներով փորձել են մոտենալ ատոմակայանին, սակայն ծովային ոստիկանությունը եւ ափային պաշտպանության ծառայությունը թույլ չեն տվել նրանց իրականացնել իրենց մտադրությունը:

Հնդկաստանում ՌԴ դեսպան Ալեքսանդր Կադակինը անցյալ տարվա դեկտեմբերի վերջին հայտարարել էր, որ ատոմակայանի շինարարության դեմ ակցիաները ֆինանսավորվում են արտասահմանյան ոչ կառավարական կազմակերպությունների կողմից: Նույն կարծիքն էր հայտնել նաեւ Հնդկաստանի վարչապետի աշխատակազմը:

«Կուդանկուլամ» ԱԷԿ-ի առաջին բլոկը պետք է գործարկվեր 2011 թվականի վերջին, սակայն անցյալ տարվա հոկտեմբերին ցուցարարները փակել էին ատոմակայան տանող ճանապարհը` թույլ չտալով ավարտին հասցնել օբյեկտի շինարարությունը: Այս տարվա մարտին նահանգի կառավարությունը վերսկսել է շինարարությունը` չնայած բողոքներին: Ավարտին է մոտենում նաեւ երկրորդ էներգաբլոկի շինարարությունը: Երկրի վարչապետը հայտարարել է, որ առաջին էներգաբլոկը գործարկվելու է ապրիլին: