Հայկական ԱԷԿ-ը սարսափեցնում է

Վրաստանի նախկին նախագահ Էդուարդ Շեւարդնաձեն դիմել է Վրաստանի կառավարությանը` կոչ անելով անհապաղ բանակցություններ սկսել Հայաստանի իշխանությունների հետ Մեծամորի ատոմակայանից եկող սպառնալիքի առնչությամբ. տեղեկացնում են վրացական լրատվամիջոցները:

«Ինչպես պարզվել է, այդ ատոմակայանը բարդ վիճակում է, եւ այնտեղ անվտանգության ոչ մի երաշխիք չկա, ինչն ակնհայտորեն սպառնում է ամբողջ տարածաշրջանին»,- նշել է Վրաստանի նախագահը եւ հայտարարել որ նման պայմաններում Վրաստանի իշխանությունները պարտավոր են բանակցություններ սկսել Հայաստանի հետ եւ անել հնարավորը հավանական ողբերգությունից խուսափելու համար:

Ի դեպ,  «Շաբաթվա ներկապնակ» վրացական հանդեսի հարցման մասնակիցների 86,3 տոկոսը հայտարարել է, որ Մեծամորի ԱԷԿ-ը չափազանց լուրջ վտանգ է ներկայացնում Վրաստանի եւ նրա բնակչության համար, շուրջ 3 տոկոսը հակառակ կարծիքին է, իսկ մյուսները չեն կարողացել միանշանակ պատասխանել այդ հարցին: