Իշխանությունը չունի ռեսուրս եւ ցանկություն` նոր Մարտի 1 կազմակերպելու համար. Խուրշուդյան

ՀՀ նախագահի ընտրությունների ժամանակ «Ժառանգություն» կուսակցությունը բազմաթիվ ընտրատեղամասերում ունեցել է հանձնաժողովի անդամներ: Որտեղ ունեցել է վստահված անդամներ, առավելագույն խախտումներ են գրանցել, որտեղ չի ունեցել, առավել հեշտ են կեղծարարներն աշխատել: Yerkir.am-ի հաղորդմամբ` այս մասին այսօրվա ասուլիսի ընթացքում հայտարարել է «Ժառանգության» մամուլի խոսնակ Հովսեփ Խուրշուդյանը:

«Հեռավոր գյուղեր կան, որ 100 տոկոսանոց արդյունք են արձանագրել, 99 տոկոսը Սերժ Սարգսյանն է ստացել: Որոշ գյուղերում, հատկապես հեռավոր շրջաններում, կադրեր չենք ունեցել, հանձնաժողովի անդամների եւ վստահված անձանց համար հեշտ է եղել կեղծելը»,- ասել է նա:

Հովսեփ Խուրշուդյանը խոստովանել է նաեւ, որոշ դեպքերում հանձնաժողովի իրենց անդամներն են գայթակղվել ընտրակաշառքով:

Մամուլի խոսնակը նշել է, որ ոստիկանությունը պետք է այս ամենին հետեւի, բայց մտավախություն է հայտնել, որ վերջինը ոչինչ չի անի, աչք կփակվի ներկայացված բազմաթիվ խախտումների վերաբերյալ, իսկ վաղը ԿԸՀ-ն պաշտոնական թվերի հրապարակմամբ կվավերացնի երկրում զանգվածային ընտրակեղծիքներով ստացված արդյունքները եւ իշխանության բռնազավթման վորձը:

«Հանրապետությունով մեկ ստեղծել ենք որակապես նոր կարգավիճակ»,- ասել է Հովսեփ Խուրշուդյանն ու հավելել, որ հանրահավաքներ են լինելու բոլոր մարզերում: Որոշ մարզերի համար եղել են իրազեկումներ, իսկ որտեղ ոչ` առաջարկել է ոստիկանությանը ի գիտություն ընդունել շտապ հանրահավաքների փաստը: Նա հիշեցրել է` օրենքով սահմանված է, որ շտապ է համարվում այն հանրահավաքը, որն անցկացվում է որպես որեւէ իրադարձության արձագանք, իսկ Րաֆֆի Հովհաննիսյանի` երեկ մի շարք մարզեր կատարած այցելություններից հետո ստեղծված իրավիճակը պահանջում է շտապ արձագանք:

«Մենք հիմքեր ունենք պնդելու, որ ոստիկանութւոնը կգործի օրենքի շրջանմակներում եւ կապահովի քաղաքացիների անվտանգությւոնը»,- ասել է «Ժառանգության» խոսնակը:

Հարցին, թե հնարավոր է նոր Մարտի 1, Խուրշուդյանը պատասխանել է.

«Չեմ կարծում, որ իշխանությունը ունի ռեսուրս եւ ցանկություն` նոր Մարտի 1 կազմակերպելու համար»: