Պարտավոր ենք արդար լինել, միայն այդպես մենք կլինենք անխոցելի

Այսօր ոստիկանությունում տեղի է ունեցել աշխատանքային խորհրդակցություն, որը վարել է ոստիկանության պետ, գեներալ-լեյտենանտ Վլադիմիր Գասպարյանը, հայտնում է ոստիկանության լրատվական ծառայությունը:

Վլադիմիր Գասպարյանը կարգադրել է ամեն օր հաշվետվություն ներկայացնել ընտրախախտումների քննության ընթացքի վերաբերյալ և արդյունքների մասին պարբերաբար իրազեկել հասարակությանը:

Ոստիկանության պետն անդրադառնալով արտաքին ծառայության խնդիրներին՝ կրկին ընդգծել է այդ ոլորտում իրականացվող աշխատանքի գլխավոր սկզբունքները: «Արտաքին ծառայությունը գիտի իր գործը: Ամեն պարագայում հիշում եք, որ քաղաքացին մեր գերագույն արժեքն է՝ լինի ընդդիմախոս, թե դիմախոս: Երբ տվյալ քաղաքացին խախտում է նորմերը կամ օրենքները, օրենքով սահմանված կարգով և խստապահանջությամբ պետք է մոտենանք նրան»,- նշել է նա՝ բացատրելով, որ «խստապահանջություն» նշանակում է ոչ թե բռիություն, այլ՝ մանրամասն ներկայացնել օրենքը և վարվել դրա համապատասխան: «Մենք պարտավոր ենք արդար լինել, միայն այդպես մենք կլինենք անխոցելի»,- ասել է նա:

Ոստիկանության պետը, անդրադառնալով արտաքին ծառայության խնդիրներին, կրկին ընդգծել է այդ ոլորտում իրականացվող աշխատանքի գլխավոր սկզբունքները: Վլադիմի Գասպարյանը ստորաբաժանումների ղեկավարներից պահանջել է ուսումնասիրել ընտրատեղամասերում կատարված տեսագրությունները և ըստ արդյունքների կարգապահական տույժի ենթարկել իրենց ծառայությունը ոչ պատշաճ կատարած ոստիկաններին, իսկ հանցակազմի առկայության դեպքում դնել նաև քրեական պատասխանատվության հարցը: Այս համատեքստում անհրաժեշտ է ուսումնասիրել նաև զանգվածային լրատվության միջոցներում տեղ գտած բոլոր հաղորդումներն ու ահազանգերը, կատարել պատշաճ քննություն և հասարակությանը ներկայացնել օրինախախտ ոստիկաններին:

Վլադիմիր Գասպարյանը հանձնարարել է օրինահարգություն պահանջել նաև հանրային հավաքների մասնակիցներից՝ կազմակերպիչներին բացատրելով օրինականության պահպանման անհրաժեշտությունը: Դրան ոստիկանությունը կարող է հասնել բացառապես վերքաղաքական, վերկուսակցական, վերանձնային սկզբունքայնությամբ և հանրության հավանությանն արժանացած գործելակերպով: Ոստիկանության ծառայողներից օրինապահություն ու հանդուրժողականություն պահանջելով հասարակության հանդեպ՝ Վլադիմիր Գասպարյանը հրահանգել է միևնույն ժամանակ անհանդուրժող լինել իրենց օրենքից և օրինականությունից վեր դասողների, ոստիկանի նկատմամբ ոտնձգություն կատարողների, համակեցության կանոնները ոտնահարողների դեմ: