Բաքվում հայկական ֆիլմերի փառատոնի են պատրաստվում

Այն բանից հետո, երբ Գյումրիում և Վանաձորում Գեորգի Վանյանի նախաձեռնած` ադրբեջական ֆիլմերի փառատոնի անցկացումը տապալվեց, ադրբեջանցի քաղաքագետ և  վերլուծաբան Զարդուշտ Ալիզադեն հայտարարեց, որ պատրաստվում է Բաքվում հայկական ֆիլմերի փառատոն անցկացնել:

Vesti.az-ը քաղաքագետից հետաքրքրվել է, թե պատրաստվո՞ւմ է, այնուամենայնիվ, կազմակերպել հայկական ֆիլմերի ցուցադրություն` հաշվի առնելով գրող Աքրամ Այլիսլիի շուրջ վերջին շրջանում բարձրացված աղմուկը:

Ալիզադեն հայտարարել է, որ դա ոչ մի կերպ չի կարող ազդել փառատոնի անցկացման վրա: Նա նշել է, որ Վանյանն իրեն խոսք է տվել հայկական ֆիլմեր ուղարկել, սակայն ինքը դեռ սպասում է:

Կայքը հավելում է, որ վերլուծաբանը հայկական ֆիլմերի փառատոն անցկացնելու ցանկություն էր հայտնել դեռևս 2012-ին և խոսք տվել, որ ամենաուշը 2013-ի հունվարին այն կկայանա: Կայքի հետ զրույցում Ալիզադեն ասել է, թե այլ ծրագրով էր զբաղված և հավելել, որ այս տարվա մարտի վերջին փառատոնն անպայման կանցկացվի: