Մկնախաղ. Արման Մելիքյանը՝ մեկ միասնական թեկնածուի մասին

Լրագրողների հետ հանդիպման ժամանակ նախագահի թեկնածու Արման Մելիքանից Yerkir.am-ը հետաքրքրվեց, թե` իրատեսական է համարում մեկ միասնական թեկնածուի ձեւավորումը, որի դեպքում Հայրիկյանը ՍԴ-ից հետ կվերցնի իր դիմումը:

Մելիքյանը հայտարարեց, որ հիմա իշխանությունն ունի միասնական հակառակորդ թեկնածու՝ ի դեմս երեք թեկնածուների եռամիասնության՝ Րաֆֆի Հովհաննիսյան, Հրանտ Բագրատյան, Պարույր Հայրիկյան: Վերջիններս, ըստ նրա, ցույց են տալիս, որ հավատում են առաջիկա ընտրությունների օրինականությանը եւ իրավաչափությանը, պատրաստ են դրանց մասնակցել եւ ցանկացած արդյունքի էլ կհամաձայնեն:

«Իրենք փաստացի մասնակցում են «ընտրություններ» թատրոնին: Քանի դեռ ընտրությունների օրինականությունն ապահովված չէ, այս ամենը խաղ է, որն ուղղված է նրան, որ ապակողմնորոշի քաղաքացիներին եւ պատրանք ստեղծվի, թե մեզանում ընտրություններ են լինում»,- հայտարարեց Մելիքյանը եւ ընդգծեց, որ Հայրիկյանի՝ ՍԴ դիմել կամ չդիմելը էական չէ, քանի որ դրանք ընթացիկ մարտավարական խաղեր են:

Իսկ հիմնական նպատակը մարդկանց ուշադրությունը շեղելն է: Մեկ միասնական թեկնածուի հարցը Արմեն Մելիքյանն անհեթեթություն է համարում, քանի որ թեկնածուների ինքնաբացարկի ժամկետն արդեն ավարտվել է, ուստի լավագույն դեպքում կարող են երեք թեկնածուներով հավաքվել եւ որոշել, որ նրանից մեկը դառնում է իրենց կողմից հռչակված միասնական թեկնածու եւ կոչ անեն իրենց ընտրողներին` ձայն տալ հենց այդ մեկին: Սա էլ է անհեթեթություն, քանի որ, ըստ Մելիքյանի, Րաֆֆի Հովհաննիսյանի եւ Բագրատյանի կողմնակիցները Պարույր Հայրիկյանին ձայն չեն տա: «Սա մկնախաղ է, որին ես չեմ կարող լուրջ վերաբերվել»,- հայտարարեց նախագահի թեկնածուն: