''Կինը'' ֆիլմը կցուցադրվի ԼՂՀ սահմանամերձ գյուղերում

Կինոռեժիսոր Արշակ Զաքարյանի «Կինը» կարճամետրաժ ֆիլմը «կմեկնի» Լեռնային Ղարաբաղ` շրջագայության: Այս մասին yerkir.am-ի հետ զրույցում նշեց Զաքարյանը:

Ըստ նրա` ֆիլմը կցուցադրվի Ղարաբաղի սահմանամերձ գյուղերում:

«Հիշո՞ւմ եք` տարիներ առաջ հաճախ էին նման միջոցառումներ կազմակերպվում, երբ մի քանի ֆիլմեր շրջագայում էին գյուղերով: Բացի իմ ֆիլմից, եւս երկու ֆիլմի ցուցադրություն կլինի. կցուցադրվի Լիանա Զախարյանի «Գտնված հայրենիք» ֆիլմը, որը պատմում է այն մասին, թե ինչպես են Սիրիայից եկած հայերը ԼՂՀ-ում տուն կառուցում եւ ապրում: Իսկ երրորդ ֆիլմի մասին դեռ ոչինչ ասել չեմ կարող»,- ասաց Զաքարյանը:

Հիշեցնենք, որ «Կինը» կարճամետրաժ կինոնկարը մասնակցում է Լեհաստանում անցկացվող Zoom Zblizenia միջազգային կինոփառատոնին, որը տեղի կունենա փետրվարի 21-ին: Ֆիլմը պատմում է բանակ մեկնող տղայի եւ նրա մոր զգացողությունների մասին: