Ինչ է արել անցած տարում ԱԻՆ-ը

ՀՀ Արտակարգ իրավիճակների նախարարությունն այսօր կառավարությունում ներկայացրել է 2012թ. իր կողմից կատարված աշխատանքների հաշվետվությունը:

Ըստ դրա` 2012թ. զգալի աշխատանք է կատարվել «911» ծառայության զարգացման ուղղությամբ` վերականգնվել է ՀԱԷԿ-ի հետ ուղիղ հեռախոսակապը, ներդրվել է տարածաշրջանում եզակի ճարտարապետական շինությունների և տարածքների հակահրդեհային ավտոմատացված վերահսկման և ազդարարման համակարգ, հրշեջ և փրկարարական 100 մեքենայի վրա տեղադրվել են GPS սարքեր, հիմնվել է մարդկանց զանգվածային կուտակման վայրերի տեսավերահսկման շուրջօրյա համակարգ, որին միացվել են Երևանի մետրոպոլիտենի կայարաններում տեղադրված 164 տեսախցիկները, համալրվել են տեղեկատվական բազաները։ ՃԿԿ-ում ներդրվել է նաև մայրաքաղաքում հասցեների որոնման և տեղորոշման ծրագրային համակարգ։

Ձեռք է բերվել 9 շարժական, 15 ստացիոնար հակակարկտային կայան և դրանց գազալցավորման համար նախատեսված 2 բեռնատար աավտոմեքենա:

Սեյսմիկ դիտացանցի արդիականացման և վերազինման նպատակով հայ-ճապոնական ծրագրով Երևանում տեղակայվել է 5 թվային սեյսմիկ դիտակայան, Ֆրանսիայի սեյսմոլոգիական ծառայության աջակցությամբ Հայաստանի տարածքում տեղադրվել է 9 սեյսմիկ դիտակայան, ԱԷՄԳ-ի աջակցությամբ ձեռք է բերվել 6 նորագույն սեյսմիկ կայան՝ ՀԱԷԿ-ի շրջակայքում տեղակայելու համար, իսկ ՄԱԶԾ օժանդակությամբ` 15 հորատանցքերի վրա տեղադրվելիք ուժեղ երկրաշարժերի կանխատեսման թվային սարքավորումներ։

Ճգնաժամային կառավարման կենտրոնում և «911» ծառայությունում ստեղծվել է 30 հաշմանդամի աշխատատեղ, և 11 հաշմանդամ ներկայումս փորձաշրջան է անցնում է։

Ամբողջական հաշվետվությանը կարող եք ծանոթանալ ԱԻՆ պաշտոնական կայքում: