Արարատի մարզպետը` Հովիկ Աբրահամյանի որդու մասին

Արդեն տեւական ժամանակ է (նախ խորհրդարանական ընտրություններից առաջ եւ հետո, հիմա էլ նախագահական ընտրությունների նախաշեմին), ինչ մամուլում լուրեր են շրջանառվում, որ ԱԺ նախագահ Հովիկ Աբրահամյանը` որդուն` Արգամին, մտադիր է դարձնել կա'մ Արտաշատի քաղաքապետ, կա'մ, որ առավել հաճախ է շրջանառվում' Արարատի մարզպետ:

Արդեն մի քանի անգամ, նաեւ` այսօր, այս մասին գրում է lragir.am կայքը, տեղեկությունն ինչպես միշտ հերքվում է եւ իրականություն այդպես էլ չի դառնում:

Yerkir.am-ը Արարատի մարզպետ Էդիկ Բարսեղյանից փորձել է պարզել, թե որքանո՞վ են այս տեղեկությունները համապատասխանում իրականությանը:

Ըստ lragir.am-ի այսօրվա հրապարակման` «Հովիկ Աբրահամյանը մտադիր է որդուն դարձնել Արտաշատի քաղաքապետ, իսկ Արտաշատի ներկայիս քաղաքապետ Գագիկ Մուրադյանը նշանակվելու է Արարատի մարզպետ, բայց Մուրադյանը լինելու է ընդամենը «տեղապահ»:

Արարատի մարզպետը հերթական անգամ լուրը հերյուրանք որակեց, նաեւ հավելեց, որ «Արգամը շատ խելոք, բացառիկ գրագետ եւ կայացած տղա է»: Բարսեղյանը հիշեցրեց նաեւ, որ Արտաշատի քաղաքապետը պաշտոնավարելու դեռ երեք տարի ունի: