Հայ ֆուտբոլիստը Մոլդովայի ազգային հավաքականում խաղալու հրավեր է ստացել

Տիրասպոլի «Շերիֆի» հայ պաշտպան Արտյոմ Խաչատուրովը հրավիրվել է Մոլդովայի ազգային հավաքական, որը պատրաստվում է ընկերական հանդիպում անցկացնել Ղազախստանի հավաքականի հետ, հայտնում են մոլդովական ԶԼՄ-ները: Խաչատուրովը Մոլդովայի քաղաքացի է եւ այդ երկրի երիտասարդական հավաքականում հանդես գալու փորձ ունի:

2012թ. աշնանը նա ցանկություն հայտնեց ներկայացնել Հայաստանը, իսկ նոյեմբերին հրավեր ստացավ ՀՖՖ-ից՝ մասնակցելու Լիտվայի հետ ընկերական խաղին: Խաչատուրովի փաստաթղթերն այդ պահին պատրաստ չէին, ուստի խաղացողը չժամանեց Երեւան: Իսկ այժմ ակտիվացել են մոլդովացիները, քանի որ Խաչատուրովը Հայաստանի դրոշի ներքո որեւէ հանդիպում չի անցկացրել եւ դեռ իրավունք ունի ներկայացնելու Մոլդովան: Ներկայումս Խաչատուրովի գործը քննարկում է ՖԻՖԱ-ն, քանի որ խաղացողը ցանկություն է հայտնել փոխել ֆեդերացիան: