ՔԿՀ-ի պետը կալանավորների ինքնավնասման դեպքերի համա՞ր է ''պատժվել''

Արդարադատության նախարարության «Դատապարտյալների հիվանդանոց» քրեակատարողական հիմնարկի օպերատիվ բաժնի պետ Կարեն Կիրակոսյանի աշխատանքից ազատումը պայմանավորված է ծառայողական պարտականությունները անհարգելի պատճառով չկատարելու հետ: Իսկ թե  կոնկրետ ի՞նչ պարտականություններ կատարելուց է թերացել պաշտոնյան, yerkir.am-ի հետ զրույցում ՀՀ ԱՆ քրեակատարողական վարչության հանրային կապերի բաժնի պետ Գոռ Ղլեչյանն ասաց, որ մինչև չավարտվի ծառայողական քննությունը` չեն կարող ասել պատճառը:

Հարցին, թե «Դատապարտյալների հիվանդանոց» ՔԿՀ-ի պետի և բաժնի մյուս աշխատակիցների նկատմամբ կիրառված նկատողությունները հնարավո՞ր է` պայմանավորված լինեն այս շաբաթ տարբեր ՔԿՀ-ներում  դատապարտյալների կողմից կատարված ինքնավնասման դեպքերով, Ղլեչյանը պատասխանեց. «Ո'չ, նման բան չկա,  իրենց պարտականությունների կատարման ընթացքում հնարավոր են թերացումներ, որոնք բացահայտվել են ծառայողական քննությամբ, դա նորմալ երևույթ է»:

Հիշեցնենք, որ այս շաբաթ  «Վանաձոր» և «Սևան» ՔԿՀ-ներում 2 բանտարկյալ կարել էին բերանները և հացադուլ հայտարարել, ինչին անդրադարձել էր yerkir.am-ը, իսկ մեկ ուրիշ բանտարկյալ էլ «Հրազդան» ՔԿՀ-ում  29 ասեղ էր մտցրել մարմնի տարբեր հատվածներ,  որից հետո տեղափոխվել էր «Դատապարտյալների հիվանդանոց» ՔԿՀ: Կալանավորը հիվանդանոցից զանգել էր «Առավոտի» խմբագրություն և հայտնել այդ մասին` ասելով, որ երբ կալանավորը բողոքում է կամ զանգում է լրագրողին, ծեծում են: