Վանաձորցի ուսանողուհուն 5 տարի ազատազրկում է սպառնում

Լոռու մարզի ընդհանուր իրավասության դատարանում է Վանաձորի պետական մանկավարժական ինստիտուտի 21-ամյա ուսանողուհու գործը: Նա իր նախկին դասախոսին մեղադրել է իր կամքին հակառակ իր հետ սեռական հարաբերություններ ունենալու մեջ:

21-ամյա  Մ. Վ-ին մեղադրանք է առաջադրվել այն բանի համար, որ նա վրեժխնդիր լինելու շարժառիթով  Վանաձորի ոստիկանությունում տվել է սուտ մատնություն, որը զուգորդվել է իր նախկին դասախոս Ա. Հ-ին ծանր հանցագործության մեջ մեղադրելով: Խափանման միջոց ընտրվել է ստորագրությամբ չհեռանալը:

Հիշեցնենք, որ օգոստոսի 11-ին Վանաձորի պետական մանկավարժական ինստիտուտի ուսանողուհի Մ. Վ-ից Լոռու մարզի դատախազին ստացվել է հաղորդում այն մասին, որ ՎՊՄԻ դասախոս Ա. Հ-ն իր կամքին հակառակ սեռական հարաբերություններ է ունեցել իր հետ` վախեցնելով ու բռնություն կիրառելով իր նկատմամբ, սակայն դասախոսը պնդել է, որ ինքը որեւէ սեռական գործողություններ չի արել նշված ԲՈՒՀ-ի ուսանողուհու հանդեպ: 

Նշենք, որ  ՀՀ  քրեական օրենսգրքի 333 հոդվածի 2-րդ մասի 1-ին կետով` հանցագործության մասին սուտ մատնությունը, եթե անձը գործել է` գիտակցելով, որ իր տրամադրած տեղեկատվությունը կեղծ է եւ այն զուգորդվել է ծանր կամ առանձնապես ծանր հանցագործության մեջ մեղադրելով, պատժվում է ազատազրկմամբ` առավելագույնը 5 տարի ժամկետով: