Ոստիկանությո՞ւնը գումարում-հանում չգիտի, թե՞ ԿԸՀ-ն

Ազգային ժողովի ընտրություններից առաջ նախնական ցուցակներում ընտրողների թիվը կազմում էր 2 միլիոն 485 հազար 844: Իսկ 2013թ. հունվարի 6-ի դրությամբ՝ ընտրողների նախնական թիվը (մայիսի 6-ից մինչեւ հունվարի 6-ն ընկած ժամանակահատվածում) աճել է 25 հազար 53-ով. հայտարարել է ՀՀ ոստիկանության անձնագրային եւ վիզաների վարչության պետ Հովհաննես Քոչարյանը:

Ավելացնելով այդ թիվը՝  նա, սակայն, չի նշել, թե կոնկրետ որքան է ընտրողների ընդհանուր թիվը: Մենք 2 միլիոն 485 հազար 844-ին գումարում ենք 25,053 եւ ստանում ենք 2 միլիոն 510 հազար 897:

Մինչդեռ ՀՀ Կենտրոնական ընտրական հանձնաժողովի կայքում տեղադրված` ընտրողների հիմնական ցուցակներով ընտրողների թիվը (ոստիկանության ներկայացրած ցուցակները) 2012թ. մայիսի 6-ին կայացած ընտրություններում արդեն 2 միլիոն 501 հազար 597 էր, իսկ ընդհանուր թիվը (լրացուցիչ ցուցակները, էլեկտրոնային քվեարկությունները, հաշվառում չունեցող եւ ըստ գտնվելու վայրի քվեարկողների թիվը ներառյալ)՝ 2 միլիոն 522 հազար 906: Փաստորեն, հիմնական ցուցակներով ընտրողների թիվն աճել է 9300-ով, իսկ եթե հաշվի ենք առնում ընդհանուր թիվը, պակասել է 12009-ով:

Դեմ չէինք լինի ԿԸՀ-ից եւ ոստիկանությունից տրամաբանական բացատրություն ստանալ այս թվային հնարքների վերաբերյալ: