Աղվան Վարդանյանը Ձմեռ պապից ոգեշնչում է ակնկալում

Yerkir.am-ի զրուցակիցն է ԱԺ ՀՅԴ խմբակցության քարտուղար Աղվան Վարդանյանը:

-Ավանդական հարց` ինչպե՞ս եք դիմավորում Ամանորը:

-Սիրով:

-Որտե՞ղ, ո՞ւմ հետ:

-Տանը` ընտանիքիս հետ` երեխաներիս, թոռներիս:

-Մեր քաղաքական գործիչներից շատերի մոտ մոդա է դարձել Ամանորն անցկացնել արտասահմանում, Դուք դա ընդունո՞ւմ եք:

-Ամեն մեկն ինքն է որոշում իր ապրելակերպը: Վերջին տարիներին ես շատ հաճախ Ծաղկաձորում եմ անցկացնրել Նոր տարին: Այս տարի չեմ գնում զուտ անձնական պատճառներով` հորս մահվան առաջին տարին է:

-Ի՞նչ նվեր եք մատուցում Ձեր ընտանիքի անդամներին:

-Սովորաբար, Ձմեռ պապին է նվերներ բերում թոռնիկների համար: Կարծում եմ` շատ լավ Ձմեռ պապի ունենք:

-Ո՞վ է Ձեր տան Ձմեռ պապին:

-Չգիտեմ (ծիծաղում է):

-Իսկ ո՞րն է եղել ամենահիշարժան, տպավորիչ նվերը, որ մանկության տարիներին ստացել եք Ձմեռ պապից:

-Մեր մանկությունն անցել է է աշխարհի ծերում, սարերի մեջ, կորած-մոլորած մի գյուղում, այնտեղ այս կարգի բաները շատ էլ հասկանալի չէին, ամեն ինչն էլ նվեր էր, հատուկ հիշողություն չունեմ... Այն ժամանակ ամենահիշարժան նվերը գիրքն էր:

-Ձմեռ պապին գոնե հավատացե՞լ եք:

-Չեմ հիշում, մեր գյուղերում ընդհանրապես Ձմեռ պապի կա՞ր, թե՞ չկար:

-Որոշակիություն չկա՞ր:

-Անորոշ մանկություն ենք ունեցել, նոր եմ հասկացել, որ կա (ծիծաղում է):

-2013թ. Ձեր ցանկությունները:

-Խաղաղություն, որ մարդիկ իրար ավելի հարգեն ու գնահատեն, ազնիվ ու բարեսիտ լինեն, հասկանան, որ մենք բոլորս նույնն ենք` կավից ու կտորից ենք, փորձենք իրար կողքի կանգնել, օգնել, լրացնել, մի քիչ մեզ հավատացող լինենք:

-Անձամբ Ձեզ համար ի՞նչ եք ցանկանում:

-Ինձ համար արդեն քիչ բան է պետք` հոգու խաղաղություն, հանգիստ, որ կարողանամ աշխարհին ու իրերին, մարդկանց նայել հավասար աչքով, չնեղացնել ուրիշներին, թեեւ դա չեմ խոստանում,  երբեմն նեղացնում եմ...

-Ձմեռ պապին Ձեզ տոպրակ է բերելու, ի՞նչ եք ցանկանում, որ մեջը լինի:

-Ոգեշնչում:

Զրուցեց Ագնեսա Խամոյան