Սահակաշվիլին պահանջում է չդադարեցնել Կարս-Ախալքալաք երկաթուղու շինարարությունը

Վրաստանի նախագահ Միխեիլ Սահակաշվիլին վճռականորեն պահանջում է կառավարությունից եւ վարչապետ Բիձինա Իվանիշվիլիից լուրջ հասարակական քննարկումներ սկսել եւ ոչ մի որոշում չկայացնել Կարս-Ախալքալաք երկաթուղու շինարարության դադարեցման վերաբերյալ. տեղեկացնում է apsny.ge-ն:

Սահակաշվիլին տագնապալի է համարում շինարարության դադարեցումը` երկրի եվրաինտեգրման կուրսից շեղվելու առումով, քանի որ երկաթուղին հնարավորություն կտա, շրջանցելով Ռուսաստանը, կապվել Եվրոպայի հետ: Նա այդ երկաթուղու շինարարությունը համարում է նաեւ անկախ Վրաստանի ձեռքբերումներից մեկը:

«Խոսակցությունները, թե այդ նախագիծը վտանգում է էկոլոգիան, հորինված են եւ հիմարություն են, ոչ ավելին: Երկրորդ` բանակցություններ են տարվում, որ ինչ-որ բանի դիմաց ամբողջությամբ անցնենք ռուսական էլեկտրաէներգիային եւ գործնականում բանակցում են, որ ռուսական էլեկտրաընկերությունից հանենք պարտավորությունները, որոնք ծառայում էին նոր հզորությունների ստեղծմանը եւ Վրաստանը տանում էին էներգաանկախության: Այս երկու հայտարարությունները մեզ հեռացնում են Եվրոպայից եւ ստրկական հարաբերությունների մեջ դնում ՌԴ-ից»,- հայտարարել է Սահակաշվիլին: