Բաքու-Թբիլիսի-Կարս երկաթգծի շինարարությունը Թուրքիան կավարտի 2 ամսից

Թուրքիան նախատեսում է 2 ամսից ավարտել Բաքու-Թբիլիսի-Կարս երկաթգծի շինարարությունը: Այս մասին հայտարարել է Թուրքիայի տրանսպորտի, ծովագնացության և կապի նախարար Ահմեթ Արսլանը լրագրողների հետ հանդիպման ժամանակ. տեղեկացնում է Ermenihaber-ը:

«Մոտավորապես 2 ամսվա աշխատանք է մնացել: Այժմ բավականին ծանրաբեռնված աշխատում ենք: Հաշվի առնելով եղանակային պայմաններից առաջացած դժվարությունները` նախատեսում ենք աշխատանքներն ավարտել մարտ, ապրիլ ամիսներին»,- ասել է նա:

Նախարարը ներկայացրել է նախագծի շրջանակներում առաջացած դժվարությունները՝ նշելով, որ մատակարարման շուրջ առաջացած դատական գործընթացների պատճառով առկախվել էին շինարարական աշխատանքները՝ 3 տարի ուշացնելով դրանց կատարումը:

Խոսելով երկաթգծի կարևորության մասին՝ Արսլանը նշել է, որ այն դեպի արևելք տանող միջանցքի մի շղթան է միայն: Հետագայում ավելի առաջ են գնալու՝  Ղազախստանի, Թուրքմենստանի տարածքով դեպի Կենտրոնական Ասիա, Չինաստան: