Բաքու-Թբիլիսի-Կարս երկաթուղու շինարարությունը սառեցվել է

Բաքու-Թբիլիսի-Կարս երկաթուղու շինհրապարակում ծանր իրավիճակ է ստեղծվել: Շինարարությունը սառեցված է, արդեն մի քանի ամիս է` թուրքական հատվածում աշխատանքներ չեն իրականացվում: Իրավիճակին ծանոթանալու համար Կարս է ժամանել Արդահանից թուրք պատգամավոր, Ժողովրդա-հանրապետական կուսակցության ներկայացուցիչ Էնսար Օգյութի գլխավորած պատվիրակությունը. տեղեկացնում է Regnum-ը:

Տեղի իշխանությունների հետ զրույցից պարզվել է, որ մասնագետների եւ բանվորների խիստ կարիք կա: Դա պայմանավորված է նաեւ Թուրքիայի արեւելյան շրջաններից միգրացիայի մեծ տեմպերով:

Օգյութն այդ կապակցությամբ կոչ է արել նախաձեռնող երկրներին` Վրաստանին, Թուրքիային եւ Ադրբեջանին, խորհրդակցություն անցկացնել: Նա նաեւ հավելել է, որ թեեւ խոստացվել էր երկաթուղին շահագործման հանձնել 2014-ին, հնարավոր է` այն պատրաստ չլինի նույնիսկ 2015-ին: