Մոսկվայում Սերժ Սարգսյանին կստիպեն ստորագրե՞լ

Սերժ Սարգսյանն այսօր մեկնելու է ՌԴ մայրաքաղաք Մոսկվա: Ըստ պաշտոնական հաղորդագրության` նա մասնակցելու է ՀԱՊԿ հավաքական անվտանգության խորհրդի նստաշրջանին: Սակայն, ինչպես հաղորդում են «Ժողովուրդ»-ի լավատեղյակ աղբյուրները, Մոսկվայում Ս. Սարգսյանին բավական լուրջ խոսակցություն է սպասվում ՌԴ նախագահ Վլադիմիր Պուտինի հետ. նրան ՌԴ-ում առաջարկելու են ստորագրել փաստաթղթեր, այդ թվում` Մաքսային միասնական միությանը ՀՀ-ի անդամակցության մասին:

Ընդ որում, ըստ թերթի, այդ փաստաթղթերն աշխատել են որոշակիորեն փոփոխությունների ենթարկել, քանի որ Հայաստանն ընդհանուր սահման չունի միության անդամ երկրների հետ:

Ս. Սարգսյանի մամուլի քարտուղարը, «Ժողովուրդի» հարցին ի պատասխան, ասել է, որ պաշտոնական հաղորդագրությանն ավելացնելու բան չունեն:

Ի դեպ, «Ժողովուրդ»-ը տեղեկացրել էր, որ մինչև Ս. Սարգսյանը, նաև Ուկրաինայի նախագահ Վիկտոր Յանուկովիչն է մեկնելու Մոսկվա: Երեկ պաշտոնապես հայտնի դարձավ, որ նա Պուտինի հետ քննարկել է Մաքսային միասնական միությանն անդամակցության հարցը: