Սահմանադրական բարեփոխումները քաղաքական պասիվ ուժերին կստիպեն ակտիվանալ. Մանասերյան

Սահմանադրական բարեփոխումներին անցում կատարելը վաղ է մեր երկրի համար. այսօր լրագրողներին իր կարծիքը հայտնեց տնտեսագետ Թաթուլ Մանասերյանը:

«Վաղ է անցում կատարել խորհրդարանական մոդելին: Սա ռիսկային փաստաթուղթ է, որ մարտահրավեր է այսօրվա իրականությանը, սակայն կարևոր է այն, որ այն առաջ նայող է: Ես, այնուամենայնիվ, չեմ կարող չողջունել այս փաստաթղթի որոշակի դրույթներ»,- ասաց տնտեսագետը: Նրա խոսքով`պետք է այնպես անել, որ տնտեսական կառավարման համակարգը համարժեք լինի ՀՀ պայմաններին և դառնա ավելի արդյունավետ:

Մանասերյանը նշեց, որ առաջիկա տարիներին Սահմանադրության նոր մոդելը կարող է համարվել կայացած:

«Սահմանադրական բարեփոխումները քաղաքական պասիվ ուժերին կստիպեն ակտիվանալ: Քիչ են քաղաքական կայացած կուսակցությունները: Նոր Սահմանադրությունը նոր պայմաններ կստեղծի»,- ասաց տնտեսագետը և հավելեց, որ ինքը միշտ ասել է` ընտրողը պետք է հնարավորություն ունենա հետ կանչելու իր ընտրած պատգամավորին, սակայն նոր Սահմանադրությունն այսպիսի հնարավորություններ չունի: