Բեմում պայքարում էին կինն ու տղամարդը

«Գիսանե» երիտասարդական թատերական փառատոնը մեկնարկել է:

Երեկ Գեղագիտության ազգային կենտրոնում փառատոնի շրջանակներում ցուցադրվեց «Շամիրամ և Կլեոպատրա» ներկայացումը: Ներկայացման ռեժիսորը Ալլա Բունիաթյանն է, իսկ դերասանուհինները` Երևանի թատերական ինստիտուտի ուսանողուհիներ Լիանա Ավետիսյանը /Կլեոպատրա/, Եվա Խաչատրյանը /Շամիրամ/:

Ներկայացումը ընտանեկան երջանկության մասին է, որը վերափոխում է անհանդուրժող, հավերժ տարաձայնությունների մեջ գտնվող թագուհիներին` պարգևելով նրանց կանացի երջանկություն:

Փառատոնի հանձնաժողովի նախագահ Լևոն Իվանյանն առաջին հերթին կարևորեց այն հանգամանքը, որ բեմում խաղում էին անփորձ դերասաններ, բայց նրանք պետք է կարողանային բեմից փոխանցել տրամադրություն:

«Որպես ժյուրիի անդամ և որպես հանդիսատես` կարևորում եմ դերասանական խաղը, վարպետությունը, որոնք կազմում են ներկայացման էությունը»,- Yerkir.am-ի հետ զրույցում ասաց Էրիկ Բարսեղյանը` հավելելով, որ ներկայացման թեման ազնիվ էր և արդիական` ներկայացնում էին մշտնջենական պայքարը կին-տղամարդ փոխհարաբերություններում:

Նշենք, որ յուրաքանչյուր ներկայացումից հետո ժյուրին փակ դռների ետևում քննարկում է ներկայացումը: