Ինքնասպան եղած կապիտանի կինն ու երեխան դեպքից մի քանի օր առաջ մեկնել էին գյուղ

Երեկ` մարտի 29-ի երեկոյան, Արմավիր քաղաքի բնակարաններից մեկի լոգարանում հայտնաբերվել է 29-ամյա Մեսրոպ Ղուրշուդյանի կախված դին: Նա ՀՀ ՊՆ N զորամասի զինծառայող էր` կոչումով կապիտան: Նշենք, որ մահացածն Արագածոտնի մարզի Հնաբերդ գյուղի բնակիչ էր, Արմավիրում բնակվում էր վարձով:

Հնաբերդի գյուղապետ Գոռ Հունանյանը Yerkir.am-ին պատմեց, որ Մեսրոպ Ղուրշուդյանը կնոջ և դստեր հետ էր բնակվում Արմավիրում վարձակալած բնակարանում: «Չեմ պատկերացնում`ինչ տիպի խնդիրներ կարող էր ունենալ ու ինչու պետք է գնար այդ քայլին: Նորմալ, լավ ընտանիքի տղա էր, ոչ մի վատ բան չենք տեսել նրանից: Նրա կինը երեխայի հետ եկել էր գյուղ, ու արդեն 4-5 օր է գյուղում են, Մեսրոպն էլ, քանի որ աշխատանքի էր, մնացել էր Արմավիրում, ու երեկ էլ էդ դեպքը եղել է»,- ասաց գյուղապետը: