Կաթողիկոսն օրհնել է Apple-ի համահիմնադրին

Այսօր  Գարեգին Բ Կաթողիկոսն ընդունել է  Apple ընկերության համահիմնադիր Սթիվեն Վոզնյակին, ում ուղեկցել են նաեւ «Սինոփսիս Արմենիա» ընկերության գործադիր տնօրեն Հովիկ Մուսայելյանն ու ընկերության այլ պաշտոնյաներ:

Կաթողիկոսը շնորհավորել է Վոզնյակին` ՀՀ նախագահ Սերժ Սարգսյանի կողմից ՏՏ ոլորտում համաշխարհային ներդրման համար նրան շնորհված մրցանակի առիթով: Նա ընդգծել է, որ այցի ընթացքում Վոզնյակն առիթ պիտի ունենա ճանաչելու հայ ժողովրդին եւ նրա հոգեւոր ուժի արգասիքներն ու դարերով կերտած արժեքները:

Կաթողիկոսն օրհնել է անհատական համակարգչի ստեղծողին` մարդկությանը բերած օգտակար ծառայության համար` մաղթելով նորանոր ներշնչանքներով առավել մեծ թռիչք հանուն մարդկային կյանքի զարգացման:

Իր հերթին Apple ընկերության համահիմնադիրը շնորհակալություն է հայտնել Ամենայն Հայոց կաթողիկոսին ընդունելության եւ ջերմ զրույցի համար: Սթիվեն Վոզնյակը Գարեգին Բ-ին է ներկայացրել նաեւ Apple-ի հետագա զարգացման իր տեսիլքը:

Ինչպես տեղեկացնում են Մայր Աթոռից, հանդիպման ընթացքում անդրադարձ  է կատարվել նաեւ կրոնի եւ գիտության փոխհարաբերություններին: Կարեւորվել է, որ աստվածապարգեւ շնորհները եւ գիտելիքը եւ նշվել, որ  գիտության առաջընթացը  պետք է ծառայի միմիայն մարդկության բարօրությանը: