Թուրքիան պետք է անդամակցի Եվրասիական միությանը. ռուս պատգամավոր

Թուրքիայի` Եվրամիությանն անդամակցելու հարցը մնացել է անցյալում, այդ պատճառով նա պետք է իր տեղը գտնի նոր` Եվրասիական միությունում. համարում է ՌԴ Պետդումայի պատգամավոր, քաղաքագետ Սերգեյ Մարկովը:

Նա հիշեցրել է, որ Եվրասիական միություն ստեղծելու գաղափարը ՌԴ վարչապետ Վլադիմիր Պուտինինն է: Միությանը անդամակցելու հրավերներ են ստացել Ուկրաինան, Ադրբեջանը, Ղազախստանը, Հայաստանը եւ այլ երկրներ:

«Կարծում եմ` Թուրքիան նույնպես պետք է այդ միության մասը դառնա»,- ասել քաղաքագետը:

Մարկովի կարծիքով` Եվրասիական միությունը «պետք է լինի թյուրք-սլավոնական եւ ուղղափառ-մահմեդական»: «Վլադիմիր Պուտինին եւ Ռեջեփ Թայիփ Էրդողանին կապում են ոչ միայն գործընկերային հարաբերությունները, այլեւ անձնական բարեկամությունը, եւ այդ երկու` համաշխարհային մասշտաբի առաջնորդները կկարողանան ամրապնդել այդ միությունը: Կարծում եմ, որ Ռուսաստանը եւ Թուրքիան 21-րդ դարում պետք է գործեն համատեղ»,- հավելել է ռուս պատգամավորը: