Լավրովը Բաքու այցի ընթացքում Ադրբեջանին Եվրասիական միությանը միանալու առաջարկ կանի՞

ԵՄ-ն և ՌԴ-ն Ադրբեջանի համար պայքար են սկսել. գրում է Независимая газета-ն:

Թերթը նշում է, որ այս շաբաթ երկօրյա այցով Բաքու կժամանի Եվրահանձնաժողովի նախագահ Ժոզե Մանուել Բարոզուն, իսկ հունիսի 17-18-ը Ադրբեջան կայցելի ՌԴ ԱԳՆ ղեկավար Սերգեյ Լավրովը, ապա` ռուսական մեկ այլ պատվիրակություն՝ փոխվարչապետ Դմիտրի Ռոգոզինի գլխավորությամբ:

«Բարոզուի այցը Բաքու փորձում է փրկել ԵՄ-ի «Արևելյան գործընկերություն» նախաձեռնությունը։ Սակայն այդ հույսերը, ամենայն հավանականությամբ, անիրականանալի են` պաշտոնական Բաքուն բազմիցս հայտարարել է ԵՄ-ի հետ Ասոցացման համաձայնագրի ստորագրումից հրաժարվելու մասին»,- գրում է թերթը:

Ըստ թերթի՝ ավելի մեծ ինտրիգ է պարունակում Լավրովի այցը Բաքու։

Ըստ ադրբեջանական միջազգային Caspian International Broadcasting Company (CIBC) հեռուստառադիոընկերության՝  Լավրովի, ապա Ռոգոզինի այցը Բաքու հաջորդելու է Հայաստանին Եվրասիական տնտեսական միություն ընդունելու` սպասված որոշմանը։

 CIBC-ի պնդմամբ՝ Մոսկվան ցանկանում է հասկացնել, որ, չնայած Հայաստանի հետ դաշնակցային հարաբերություններին, իրենք հետաքրքրված են Ադրբեջանի հետ ռազմավարական համագործակցությամբ։

«Ադրբեջանցի  քաղաքագետները վստահ են, որ Լավրովի այցը Բաքու ուղեկցվելու է ռուսական կողմի կարևոր առաջարկությամբ՝ Եվրասիական միությանն Ադրբեջանի անդամակցության հեռանկարի վերաբերյալ։ Ադրբեջանը, սակայն,  համագործակցության ճանապարհից չի շեղվի ո'չ եվրոպական կառույցների, ո'չ էլ Ռուսաստանի հետ հարաբերություններում»,- գրում է թերթը։