Կողմերը համաձայնել են, որ ՀՀ-ն հունիսին միանա Եվրասիական միությանը. Պուտին

Հայաստանի` Եվրասիական տնտեսական միությանը միանալու մասին պայմանագիրն անհրաժեշտ է ստորագրել  ամենամոտ ապագայում։ Այս մասին հայտարարել է ՌԴ նախագահ Վլադիմիր Պուտինն Աստանայում ընթացող` Եվրասիական տնտեսական Բարձրագույն խորհրդի նիստում. հայտնում է РИА Новости-ն:

Պուտինի խոսքերով՝ նիստի ընթացքում կողմերը քննարկել են Եվրասիական միության մասնակիցների թիվն ավելացնելու հարցն ու դիտարկել Հայաստանի՝ Միությանն անդամակցելու նախագիծը:

«Այդ փաստաթուղթն անհրաժեշտ է հաստատել և ստորագրել ամենամոտ ապագայում։ Հայկական կողմը ցանկանում էր դա անել հունիսին, ինչին մենք, ընդհանուր առմամբ, համաձայնել ենք: Հույս ունենք, որ Հայաստանը միության ստեղծումից հետո կդառնա դրա լիիրավ անդամը»,- ասել է ՌԴ նախագահը:

Նշենք, որ Նազարբաևը նույնպես ընդգծել է, որ եթե հունիսի ընթացքում բոլոր հարցերը լուծվեն, մինչև հուլիսի 1-ը Հայաստանի կանդամակցի ԵՏՄ-ին:

Ի դեպ, Պուտինը նշել է, որ Ռուսաստանի, Բելառուսի, Ղազախստանի կողմից լիազորությունների փոխանցումը ստեղծվող Եվրասիական տնտեսական միության մարմիններին «այդ երկրների ինքնիշխանության կորուստ չի նշանակում»։