Հախվերդյանի խոսքը տեղ չի՞ հասնում

«Մեր իշխանավորները պետք է սկսեն իրենցից, ավելին` մեր իշխանության համար կապ չունի` ով ինչ է ասում: Էս 20 տարի է` ասում եմ, ինչի՞ տեղ ա անցնում: Իշխանություններին այնքան էլ հետաքրքիր չեն նման հայտարարությունները, ով ուզում է ասի` լինի մեծ շանսոնիեն, թե փոքր Հախվերդյանը»,- այսօր լրագրողների հետ հանդիպման ժամանակ ասաց երգահան Ռուբեն Հախվերդյանը` խոսելով Շառլ Ազնավուրի վերջին հարցազրույցի մասին:

Հախվերդյանը հարցրեց, թե ո՞րն է տարբերությունը` Ցեղասպանության ժամանակ 1.5 միլիոն մարդ է սպանվել, իսկ այս տարիների ընթացքում 1,5 միլիոն մարդ գնացել է Հայաստանից: «Ովքեր արտասահմանում իրենց տեղն ունեն, սպանես՝ էլ հետ չեն գա. գան ինչ անեն` Մասիս սարին նայե՞ն, Մասիսին տելեվիզրով էլ կարող են նայել»,- ասաց նա:

Անդրադառնալով ներկայիս հայկական աստղերին, որոնք գրավել են հեռուստաեթերը, երգահանը նշեց, որ չի հետեւում այսօր մատուցվող երաժշտությանը եւ անգամ հեռուստացույց չի նայում, ավելին` նույնիսկ շփոթում է նրանց անունները:

Հախվերդյանի կարծիքով` մեզ մոտ կուլտուրայի պակաս կա, օրինակ` ինչպես ենք անցկացնում հարսանյաց եւ թաղման արարողությունները: «Ես այդ ձեւերը չեմ ընդունում, հատկապես այդ տխմար թամադաներին. աղջկաս հարսանիքին կես ժամ եմ մնացել, տղայիս հարսանիքին` տասը րոպե: Թաղումներն ընդհանրապես կոշմար են. հիմա մրցույթ է գնում, թե ով ինչքան ճոխ թաղում կանի»,- նշեց նա: