Բարեգործության անվան տակ ձայներ են գնում

Հայաստանում բարեգործության, որևէ օժանդակության անվան տակ ընտրողի ձայն են գնում. այսօր Քաղաքական և միջազգային հետազոտությունների հայկական կենտրոնի եւ  ԱՄՆ ժողովրդավարական ինստիտուտի կողմից կազմակերպված քննարկման ժամանակ հայտարարեց ԱԺ ՀՅԴ խմբակցության պատգամավոր Արծվիկ Մինասյանը:

Նա հիշեցրեց, որ Սահմանադրությամբ  բարեգործական կազմակերպություններին արգելվում է բարեգործություն իրականացնել ընտրությունների շեմին։ Արծվիկ Մինասյանը նշեց նաեւ, որ ՀՅԴ-ն բազմիցս առաջարկել է ընտրություններին նախորդող 3 օրվա ընթացքում ընդհանրապես արգելել բարեգործությունը, բայց այդ առաջարկությունները չեն ընդունվել:

Դաշնակցական պատգամավորն անդրադարձավ նաեւ պաշտոնական լիազորությունների, պետական կամ համայնքային միջոցների օգտագործմանը եւ,  որպես ասվածի օրինակ, նշեց, թե ինչպես է վարչապետն աշխատանքային այցով մեկնում որեւէ մարզ և աշխատանքային այցին զուգահեռ որևէ երիտասարդի խրախուսում է իր աշխատանքի համար, ու տալիս ՀՀԿ անդամատոմս: Դա, ըստ պատգամավորի, նույնպես ընտրակաշառք է:

«Ժառանգություն» խմբակցության քարտուղար Լարիսա Ալավերդյանն էլ պնդեց, թե ընտրակաշառքի առաջացման պատճառները ոչ թե ժողովրդի մեջ պետք է փնտրել, այլ քաղաքական էլիտաների շրջանում: Նա էլ, որպես ընտրակաշառքի օրինակ, նշեց ՀՀԿ-ի եւ ԲՀԿ-ի կողմից առողջապահական տարբեր ակցիաների անցկացումը:

 
Իսկ ՕԵԿ պատգամավոր Մարզպետունի Մանուկյանը նշեց, որ բարեգործությունը պետք է արվի ընտրության հաջորդող օրերին, եւ ընտրակաշառքը չպետք է նույնացվի բարեգործության հետ: «Իսկ դա օրենքով պետք է ամրագրվի»,- հայտարարեց նա:

Պատգամավորը նաեւ նշեց, թե Արցախը կարողացել է հաղթահարել ընտրակաշառքի խոչընդոտը, իսկ եթե «արցախցի մեր եղբայրները հաղթահարել են, ուրեմն մենք էլ կկարողանանք»: